اسلام آباد۔ 14اپریل (اے پی پی) بنجائی وزیر سائنس اینڈ ٹیکنالوجی چوہدری فواد حسین پارینے کہ حکومت ملک اٹی کوروناوائرس نا تالانی ءِ توننگ کن پبی کوشست کننگ ءِ، اپوزیشن جماعت آک سیاسی اختلاف آتے اسہ کنڈ تخسا ملک آن ہلوک آ دین انا چٹفنگ کن فعال کڑد اداکیر۔ سے شنبے نادے آ نجی ٹی وی چینل تون گپ وتران کرسا پارے کہ مچ آ دنیا دین انا برخلاف جنگ کننگ ءِ و داوخت اسکان اسہ ملک اس ہم دانا درمان کن ویکسین تیار کننگ کتنے ہنداخاطرآن الس آن خواست ءِ کہ او بے گرج اُراتیان پیش تمپس و رکھی گام گیج آتیا عمل کرسا دین انا مون ءِ توننگ کن زموارانہ کڑد اداکیر۔ راجی فاصلہ نا پالیسی آ عمل کرسا دین آن نجات دوئی کننگ مریک۔ چوہدری فواد حسین پارے کہ پاکستان دین انا چیلنج اتون مون تننگ کن وخت آ و مثالی گام گیج کرینے، حکومت وخت آ بالی پٹ آتے بند کرے و ملک انا گڑاس بشخ آتے ٹی جزوی لاک ڈاؤن نافذ کرے۔ اوپارے کہ حکومت لاک ڈاؤن آن زہمی مروک آدیہاڑی دار و مزور تپہ کن بھلو ریلیف پیکج اسے نا پڑو ءِ کرے و حقدار خاہوت آتے احساس ایمرجنسی کیش پروگرام نا کمک اٹ اوفتے امداد تننگ نا چرجوئی برجاءِ و داوخت اسکان لکھ آتا کچ اٹی خاہوت فائدہ ہرفینو۔ بنجائی وزیر سائنس و ٹیکنالوجی پارے کہ درآمد کروک آ ٹیسٹنگ کٹس و وینٹی لیٹرز آتا نہاد بھاز زیات ءِ ہنداخاطرآن نن کچ اٹنگا وسیلہ و وخت اٹی ہندی کہول آ ٹیسٹنگ کٹس و وینٹی لیٹرز تیار کننگ نا فیصلہ ءِ کرین، ای تینا سائنسدان ، انجینئرز و ٹیکنیشنز آتے پنچ ہفتہ ٹی مشکل ٹاسک ءِ پورو کننگ آ خراج تحسین پیش کیوہ۔
