اسلام آباد۔ 14اپریل (اے پی پی) وزیراعظم نا سلاہکار خزانہ و اقتصادی امور ڈاکٹر عبدالحفیظ شیخ پارینے کہ کوروناوائرس آن ودی مروک آ حالیت آتے ٹی الس ءِ جان جوڑی نا آسراتی تا فراوانی و اوفتے رکھ کننگ، راج انا نزور و نیزگار تپہ غاتے نغد کمکاری و زرگزران نا پہیہ ءِ کرار کرار آ پائیدار وڑاٹ چلیفنگ حکومت نا اولیت ءِ، اومیت ءِ جہانی بینک، آئی ایم ایف و پڑک 20انا ملک آک ہندن ءُ ڈٹ اس مون آ اتیرہ ہراڑآن پاکستان کون آ پدتموک ملک آتے نئے بیرہ تینا جہانی زمواری تے پورو کننگ بلکن دین آن بھاز بے وڑ زہمی مروک شاری تے ریلیف نا فراوانی ٹی ہم آسانی مریک، اوداخیال آتا درشانی ءِ پاکستان اٹی چین نا سفیر یاؤجنگ اتون اوڑدہی ٹی گپ وتران کرسا کرے۔ وزیراعظم نا سلاہکار کورونا وائرس نا عالمگیر دین اتون مون تننگ اٹ چین نا کنڈآن پاکستان ءِ داوخت اسکان تروک آ کمکاری آ چین نا حکومت نا منت واری ءِ ہرفے۔ او چینی سفیر ءِ دین آن زہمی مروک آ شاری وکاروبار و صنعت آتے کن حکومت نا کنڈآن پڑوکروک کمکی پیکج نا سرجم آتیان ہم معلومدار کرے۔ ڈاکٹر عبدالحفیظ شیخ پارے کہ مشکل نا داساہت اٹی الس ءِ جان جوڑی نا آسراتی تننگ و اوفتے رکھ کننگ ، راج انا نزور و نیزگار تپہ غاتے نغد کمک و زرگزران نا پہیہ ءِ کرار کرار آ پائیدار وڑاٹ چلیفنگ حکومت نا اولیت ءِ۔ اوپارے کہ حکومت دا رداٹ 1200ارب روپئی آن زیات نا جامع کمکی پیکج اسے نا پڑو ءِکرینے، دا پیکج اٹ مزور وخواری کش آتے کن 200ارب روپئی، چنکا و درمیانہ درجہ نا کاروبار و کشت وکشار کن 100ارب روپئی، سیلز خراج ری فنڈ اکن 107ارب روپئی، انکم خراج ری فنڈ اکن 50ارب روپئی جتا کننگانے۔ داکان بیدس احساس پروگرام نا رداٹ راج انا غٹ آن نزور تپہ غاتے نغد کمک کننگ نا چرجوئی ہم برجاءِ، پیٹرول و ڈیزل نا نہاد آتے ٹی کمتی و بجلی و گیس انا بل آتا موخر ادائیگی ہم دا پیکج نا بشخ اسے۔ اوپارے کہ حکومت تعمیرات نا بشخ اکن چندی آسودہی تا پڑو ءِ کرینے۔ داڑآن روزگار نا متلاشی بندغ آتے عزت اٹ روزی اس کٹیا کننگ نا وارخواہی دوبریک۔ ڈاکٹر عبدالحفیظ شیخ چین نا سفیر ءِ کورونا وائرس نا عالمگیر دین آن ملک انا جم اٹنگا زرگزران آ تموک آ اثر آتیان معلومدار کرسا پارے کہ دین آن جہانی زرگزران کسادبازاری نا گواچی مسنےو پاکستان اٹی داٹی برآمدات و ترسیلات زر اٹی کمتی بننگ کیک۔ اوپارے کہ ملک آتا اقتصادی نسخان تے سگنگ نا لائخی تا بابت جتا جتا استعداد ءِ و ساڑی آ زرگزرانی سست روی آن پدتموک آ ملک آتا زرگزران آک بھاز بے وڑ زہمی مریرہ، ساڑی آ منظرنامہ ءِ مون آ تخسا جہانی بینک، آئی ایم ایف و پڑک 20انا ملک آتا وام تیٹی ریلیف نا ہیت ءِ کننگ اُن انتئے کہ داڑآن بیدس دا ملک آک بھاز زہمی مریرہ۔ وزیراعظم نا سلاہکار دا اومیت نادرشانی ءِ کرے کہ جہانی بینک، آئی ایم ایف و پڑک 20انا ملک آک ہندن ءُ ڈٹ اس مون آ اتیرہ ہراڑآن پاکستان کون آ پدتموک ملک آتے نئے بیرہ تینا جہانی زمواری تے پورو کننگ بلکن دین آن بھاز بے وڑ زہمی مروک آ شاری تے ریلیف نا فراوانی ٹی ہم آسانی مریک۔ اوپارے کہ پاکستان دین آن ودی مروک آ بھلا حالیت آتون مون تننگ اٹ پین چینی کمکاری نا چاری ءِ۔
