نیزگار و کم کٹیا کروک تپہ غاتے کوروناوائرس نا عالمگیر دین انا منفی زہم تیان بچفنگ حکومت نا اولیت آتے ٹی اوار ءِ، حماد اظہر

اسلام آباد۔ 03اپریل (اے پی پی) بنجائی وزیر اقتصادی امور حماد اظہر پارینے کہ نزگار و کم کٹیا کروک تپہ غاتے کروناوائرس نا عالمگیر دین انا منفی زہم تیان بچفنگ حکومت نا اولیت آتے ٹی اوار ءِ ، کوروناوائرس نا عالمگیر دین اتون مون تننگ کن جہانی بینک انا امداد آن دین اتون مون تننگ نا تیاری و جان جوڑی نا نظام ءِ سوگو کننگ اٹ کمک رسینگک۔ اوداہیت ءِ جمعہ نادے آ داڑے جہانی بینک اناکنڈآن پاکستان ءِ پین 200ملین ڈالر نا کمکاری نا معاہدہ غادستخط کننگ نا دود آن تران کرساپارے۔ پاکستان و جہانی بینک انا نیام اٹ 200ملین ڈالر نا فنانسنگ نا معاہدہ غا دستخط نا دود اقتصادی امور ڈویژن اٹ مس۔ بنجائی وعزیر داوخت آ تران کرسا جہانی بینک انا کنڈآن فنانسنگ ریلیف نا فراوانی آ منت واری ءِ ہرفے وپارے کہ دا امداد آن پاکستان اٹ کروناوائرس نا دین اتون مون تننگ نا تیاری و جان جوڑی نا نظام ءِ سوگو کننگ اٹ کمک رسینگک۔ اوپارے کہ داپروجیکٹ نا بنداوی جانجوڑی نا ہند انا بشخ مریک۔ بنجائی وزیر پارے کہ جہانی بینک انا کنڈآن تروک آ فنڈ آتے کروناوائرس نا توننگ ، اونا تشخیص ودرمان کن کاریم اٹ اتنگک۔ او پارے کہ فنڈز آتے دین اٹی زرگزرانی رکھ وتعلیمی مون آ دننگ کن ہم کاریم اٹ اتنگک۔ حماد اظہر پارے کہ ننا اولیت نیزگار و کم کٹیا کروک تپہ غاتے دین انا منفی زہم تیان بچفنگ نا ءِ۔ ڈٹ انا دنگ مچ آ ملک اٹ مریک۔ ہراٹی ملک انا غٹ صوبہ و علاقہ غاتے اوار کننگک۔ اوپارے کہ ڈٹ انارداٹ 4ملین خاہوت آتے ہلہلہ ئی بنداو تیا نغد زر و خور سرکننگک۔ داکان بیدس آن لائن خوانفنگ و کسب کلاس آتا کمک اٹ چناو ورناتے دین نا منفی زہم تیان بچفنگک۔ پاکستان اٹ جہانی بینک انا کنٹری ڈائریکٹر الانگو پیچوموتو دا وخت آ پارے کہ جہانی بینک کروناوائرس تون مون تننگ نا کوشست آتے ٹی پاکستان تون تینا کمکاری نا چرجوئی ءِ برجاتخک۔ اوپارے کہ جہانی بینک پاکستان تون اوار کیہی ملک آتے ٹی کوروناوائرس نا عالمگیر دین انا زہم آتون مون تننگ کن کمک فراوان کننگ ءِ ، جہانی بینک انا بورڈ آف ڈائریکٹرزدرو پاکستان اٹ دین اتون مون تننگ نا کوشست آتے سوگوی تننگ کن پین 200ملین ڈالر گرانٹ نا منظوری ءِ تسنے، تدوک آ ہفتہ بینک پاکستان کن 40ملین ڈالر نا گرانٹ نا منظوری ءِ تسوسس، دا فنڈ آن پاکستان نا بنجائی و صوبائی حکومت آک دین اتون مون تننگ کن ہلہلہ ئی بنداو تیا طبی گڑا، وینٹی لیٹرز و ایلو ازباب آتا ہلنگ اٹ عمل اٹ اتنگ انگ ءِ۔ اوپارے کہ جہانی بینک پاکستان اٹ راج نزور تپہ غاتے لاک ڈاؤن نا رداٹ ضروری آ گڑاتا فراوانی و دین انا دے تیٹی فاصلاتی تدریس ءِ گچین کننگ اٹ ہم کمک فراوان کننگ ءِ۔ جہانی بینک انا کنٹری ڈائریکٹر مستی پارے کہ بینک پاکستان تون کمکاری نا چرجوئی ءِ برجاتخک۔ اوپاکستان نا شاری تیکن نیک است خواہی تا درشانی ءِ کرسا اوفتے دین انا دے تیٹی غٹ تر رکھی و تدارکی گام گیج آتیا عمل کننگ نا پارت کرینے۔