وفاقی  وزیر احسن اقبال ءَ ازبکستان ءِ سرمایہ کاری ءِ معاون وزیر الزات کاسیموف ءَ گوں گند ءُ نند کتگ ءُ زندگ داروکیں منصوبگ ءُ دو نیمگی دمگی سیادی ءِ دیمروئی ءِ سر ءَ زور

منگولیا ۔28ستمبر  (اے پی پی): منصوبہ بندی، دیمروئی ءُ ھاسیں گامگیج آنی وفاقی وزیر احسن اقبال ءَ منگولیا ءَ ازبکستان ءِ سرمایہ کاری، صنعت ءُ تجارت ءِ نائب وزیر الزات کاسیموف ءِ سروکی ءَ ڈل ءَ گوں گند ءُ نند کت۔ گند ءُ نند ءِ تہ ءَ دمگی سیادی، سرمایہ کاری ءُ میاں اوستمانی مالی کمک ءِ ھوالگ ءَ ازبکستان اوگانستان پاکستان ریلوے منصوبگ ءِ ھوالگ ءَ گپ ءُ تران کنگ بوت۔ وفاقی وزیر احسن اقبال کہ اے وھد ءَ میاں اوستمانی ایشیا ءِ دمگی اقتصادی کمک پروگرام ءِ تہ بھر زوری ءِ واستہ منگولیا ءِ تر ءُ تاب ءَ انت آئی ءَ گوشت کہ پاکستان ءُ ازبکستان ءَ را سارسی ءِ مفاہمت ءَ را زندگ داروکیں منصوبگ ءُ ٹھوس اقتصادی آسر آنی تہ ءَ بدل کنگ ءِ ضلورت انت۔ آئی ءَ گوشت کہ ازبکستان اوگانستان پاکستان ریلوے منصوبگ ءَ میاں اوستمانی ملک آنی مارکیٹ آناں پاکستان ءِ بندر آنی گوما یکجا کنگ ءِ واستہ ھاسیں کرد پیلو کت کنت۔ وفاقی وزیر ءَ ریلوے منصوبگ ءِ فزیبلٹی اسٹڈی ءَ را زوت سرجم کنگ ءِ ضلورت ءِ سر ءَ زور پر دات، مالی کمک ءِ یک چہ گیش ملکی ءُ دو نیمگی وسیلگ آناں پجارینگ ءُ منصوبگ ءِ سر ءَ عمل کنگ ءِ واستہ یک ھاسیں ایکشن پلان ءِ جوڑ کنگ ءِ ضلورت ءِ سر ءَ زور پر دات۔ آئی ءَ پاکستان ءُ ازبکستان ءِ نیام ءَ یکجائی مالی کمک ءِ واستہ ھمگرنچیں میکانزم ءِ جوڑ کنگ ءِ سوج دات ءُ گوشت کہ ایشی ءِ وسیلگ ءَ اولویت ءِ دمگی منصوبگ آنی واستہ میاں اوستمانی مالیاتی ادارگ ءُ دیمروئی شریک آنی نیمگ ءَ چہ یکجائی ءَ مالی کمک زورگ بوت کنت۔ احسن اقبال ءَ گوشت کہ ازبکستان اوگانستان پاکستان ریلوے منصوبگ ءَ را ایوک ءَ ریلوے منصوبگ ءِ رنگ ءَ نہ بلکیں یک یکجاھیں اقتصادی راہداری ءِ رنگ ءَ دیمروئی دیگ بہ بیت، ایشی ءِ تہ ءَ ریلوے، شاہراہ، رسد ءِ نظام، بندرگاہ ءُ صنعتی مراکز یکے دومی ءَ گوں بندوک اَنت۔ وفاقی وزیر ءَ گوشت کہ پاکستان ءُ ازبکستان ءَ را سرمایہ کاری ءِ بنیات ءَ تجارت ءُ یکجائی کاروباری منصوبگ آناں دیمروئی دیگی اِنت ھاسیں رنگ ءَ ٹیکسٹائل، دوائی آنی تہ ءَ مینوفیکچرنگ، کشت ءُ کشاری، کان کنی، انجینئرنگ ءُ انفارمیشن ٹیکنالوجی ءِ شوبگ آنی تہ ءَ کمک ءِ واستہ مزنیں موہ است اَنت۔ گند ءُ نند ءِ ساھت ءَ دوئیں نیمگ ءَ پاکستان ءُ ازبکستان ءِ نیام ءَ اقتصادی کمک ءَ را گیش مھکم کنگ ءُ استیں معاہدہ آناں ھاسیں ٹائم فریم ءُ مالی کمک ءِ بندوبست ءِ گوما ٹھوس منصوبگ آنی تہ ءَ بدل کنگ ءِ ارزشت ءِ سر ءَ تپاک کنگ بوت۔ وفاقی وزیر احسن اقبال ءَ گوشت کہ گوادر بندرگاہ ازبکستان ءُ میاں اوستمانی دمگی اقتصادی کمک پروگرام ءِ ملک آنی واستہ یک ھاسیں تجارتی راہداری جوڑ بوت کنت وھدیکہ پاکستان ءُ ازبکستان کسٹم ءِ کارروائی آنی یکوئی ءُ معیاری کنگ ءِ واستہ کمک ءَ را گیش کت کنت۔ آئی ءَ سیل ءُ سواد ءِ یکجائی پروگرام آناں دیمروئی دیگ، نودربر ءُ استاد آنی بدلی ءُ روسی زبان ءِ دربرگ ءِ سر ءَ ھم زور پر دات تانکہ روس ءُ میان اُستمانی ملک آنی تہ ءَ پاکستانی نودربر ءُ وانگ ءُ زانگ ءِ ادارگ آنی واستہ نوکیں موہ پیداک بہ بنت۔