ایم ایل ون ءِ اپ گریڈ ءَ چہ ریلوے لائن ءِ گنجائش 34 ءَ چہ 120 ٹرین ءَ گیش بیت، ءُ مسافر ٹرین آنی سپیڈ 160 کلومیٹر فی گھنٹہ ءَ گیش بیت، وفاقی وزیر احسن اقبال

منگولیا ۔28ستمبر  (اے پی پی): وفاقی وزیر برائے منصوبگ بندی احسن اقبال ءَ منگولیا ءَ میاں اوستمانی ایشیا ءِ دمگی اقتصادی کمک پروگرام کانفرنس ءِ موہ ءَ تجارت، سیل ءُ سواد ءُ دمگی رقابت ءِ دیمروئی ءِ سرھال ءِ سر ءَ دیمروئی شریک آنی گپ ءُ تران ءَ بھر زوری کت ءُ گشتانک دات۔ گپ ءُ تران ءِ ساھت ءَ وفاقی وزیر ءَ ایم ایل ون منصوبگ ءِ سر ءَ ھاسیں پیشرفت ءِ بابت ءَ سرپدی دات ءُ دیمروئی شریک آناں کراچی روہری سیکشن ءِ اپ گریڈ ءِ ھوالگ ءَ پیشرفت ءِ بابت ءَ سرپد کت۔ وفاقی وزیر ءَ میاں اوستمانی ایشیا ءِ دمگی اقتصادی کمک ءِ گل ءُ ازبکستان ءِ ڈل ءَ گوں ھم گند ءُ نند کت۔ احسن اقبال ءَ گوشت کہ ایم ایل ون پاکستان ءِ ریلوے ءِ نظام ءِ ریڑھ ءِ ھڈ اِنت کہ کراچی ءَ چہ پشاور ءَ تاں 1726کلومیٹر ءِ دمگ ءَ ھوار اِنت ءُ ریلوے ءِ 76درسد مسافر ٹریک ءُ 98درسد مال برداری ءِ کار ءَ کنت۔ آئی ءَ گوشت کہ استیں انفراسٹرکچر ءِ جیڈھ آنی باوجود ایم ایل ون ملک ءِ تجارتی ءُ اقتصادی چست ءُ ایر آنی تہ ءَ مرکزی کرد پیلو کنگ ءَ انت۔ وفاقی وزیر ءَ گوشت کہ ایم ایل ون ءِ اپ گریڈیشن ایوک ءَ ریلوے منصوبگ نہ اِنت بلکینگ ءَ راجی اولویت اِنت کہ ایشی ءَ را پاکستان ءِ اقتصادی دیمروئی ءُ تجارتی گنجائش ءَ گوں براہ راست سیادی اِنت۔ آئی ءَ گوشت کہ ایم ایل ون ءِ اپ گریڈیشن ءَ چہ ریلوے لائن ءِ گنجائش 34 ءَ چہ 120 ریل آنی تہ ءَ گیشی بیت، وھدیکہ مسافر ریل آنی سپیڈ 160کلومیٹر فی کلاک ءَ گیش کنگ بیت، وھدیکہ مال باریں ریل آنی سپیڈ 30 ءَ چہ 80 کلاک ءَ گیش کنگ بیت۔ کراچی ءَ چہ روہری ءَ سفری وھد ھم نزیک ءَ ھشت کلاک ءَ چہ کم کنگ بیت ءُ چار ءُ نیم کلاک کنگ بیت۔ احسن اقبال ءَ گوشت کہ اپ گریڈ بوتگیں ریلوے راہداری ءَ چہ گیش بوھوکیں مال برداری ءِ ضلورت آناں پیلو کنگ ءَ ھم ھاسیں کرد پیلو کنت، وھدیکہ سالانہ مال برداری ءِ لوٹ 2035ءَ تاں 21 ملین ٹن ءِ کساس ءَ سر بوھگ ءِ گمان اِنت۔ ایشیائی دیمروئی بینک اے منصوبگ ءِ مالی کمک ءِ سروکی ءَ کنگ ءَ اِنت وھدے کہ ایشیائی انفراسٹرکچر سرمایہ کاری بینک، ورلڈ بینک، اسلامی دیمروئی بینک ءُ یورپی سرمایہ کاری بینک ھم کمک ءِ پھجارینگ ءِ شریک آنی تہ ءَ ھوار اَنت۔ آئی ءَ گوشت کہ کراچی روہری منصوبگ بنداتی تک ءَ چہ دیم ءَ شتگ، منصوبگ ءِ تیاری ءِ واستہ مالی کمک رستگ، انجینئرنگ ءِ کار آنی سر ءَ دیمروئی بوتگ، وھدیکہ پروکیورمنٹ ءُ مالی کمک ءِ مراگش ھم دیم ءَ روگ ءَ انت۔ وفاقی وزیر ءَ اے گپ ءِ پدرائی کت کہ پاکستان ءِ مول ءُ مراد کراچی روہری ءَ را یک جتاہیں منصوبہ ءِ تہا محدود کنگ نہ انت بلکیں ایشی ءَ را کراچی ءَ چہ پشاور ءَ ایم ایل ون ءِ سرجمیں اپ گریڈیشن ءِ نیمگ ءَ اولی گامگیج جوڑ کنگ انت۔ آئی ءَ گوشت کہ حکومت روہری ءَ چہ پشاور ءَ تاں رند ءِ سیکشن آناں مالی کمک ءِ بندوبست ءِ سر ءَ ھم یکجاھی ءَ کار کنگ ءَ اِنت۔ احسن اقبال ءَ گوشت کہ نوں مستریں جُست دگہ اے نہ اِنت کہ ایم ایل ون ءَ را اپ گریڈ کنگ لوٹ اِیت یا نہ، لوٹ پدّر اِنت۔ اولویت نوں کراچی روہری ءِ سر ءَ بوتگیں پیشرفت ءَ را منصوبگ ءِ عملی نفاذ ءِ تہ ءَ بدل کنگ اِنت ءُ ھمے وھد ءَ راہداری ءِ دگہ بھر آنی واستہ مالی کمک ءِ بندوبست کنگ اِنت۔ آئی ءَ گوشت کہ ایم ایل ون ءِ اپ گریڈیشن ءَ چہ پاکستان ءَ را گیشیں گنجائش ءِ ریلوے راہداری رس ایت ایشی ءَ چہ گیش بوھوکیں مسافر ءُ مال ءِ ضلورت آناں پیلو کنگ ءِ گوما دمگی تجارت ءُ رابطہ ءَ را مھکم کنگ بیت۔ وفاقی وزیر ءَ گوشت کہ نوں مئے دلگوشی منصوبگ ءِ سر ءَ عمل درآمد، مالی کمک ءِ برجاہ دارگ ءُ کراچی ءَ چہ پشاور ءَ یک یکجاھیں ریلوے راہداری ءِ رنگ ءَ ایم ایل ون ءِ سرجم کنگ ءِ سر ءَ بہ بیت۔ میاں اوستمانی ایشیا ءِ دمگی اقتصادی کمک پروگرام کانفرنس ءَ وفاقی وزیر ءِ بھر زوری پاکستان ءِ دمگی شریک آنی گوما برجاھیں کمک ءُ ھوار بوھگ ءِ بھر اِنت تانکہ بنیاتی ڈھانچگ، تجارت، سیل ءُ سواد ءُ دمگی رابطہ کاری ءَ را دیمروئی دیگ بہ بیت۔