اسلام آباد۔ 23 فروری (اے پی پی) سرکاری بشخ انا شونداری پروگرام (پی ایس ڈی پی) و چین پاکستان اقتصادی راہداری ڈٹ (سی پیک) نا رداٹ توانائی و بنداوی ڈھانچہ نا بھلا ڈٹ آتا بناءآن گدرینگوک آ مالی سال 2015-16ءٹی جوڑ جاڑ نا بشخ آتا شرح نمو ٹی 13 درسد نا نمان ودکی مسنے وخت اس کہ گدرینگوک آ چار سال اٹی بشخ اناشونداری کچ چار درسد ریکارڈ کننگاسس۔ جوڑ جاڑی سرجزآتیٹی ودکی ٹی سیمنٹ نا ہندی کھپت اٹی ہم نمان ودکی مسنے۔ آل پاکستان سیمنٹ مینو فیکچر رز ایسوسی ایشن نا رپورٹ نا رداٹ اینخو مالی سال 2016-17ءٹی جولائی آن جنوری ٹی سیمنٹ نا ہندی بہاٹی 9.52 درسد وخت اس کہ سیمنٹ ناجم اٹنگا بہاٹی 7.45 درسد نا ودکی ریکارڈ کننگانے۔ رپورٹ نا رداٹ جولائی آن جنوری 2016-17ءٹی سیمنٹ نا صنعت تینا جم اٹنگا پیداواری کچ انا 85درسد نا بریبر پیداوار دوئی کرینے۔ اقتصادی جاچکار آتا پاننگ ئِ کہ پی ایس ڈی پی و سی پیک نا رداٹ توانائی و بنداوی ڈھانچہ تون اوار کیہی بشخ آتا شونداری کن حکومت نا کنڈآن بناکروک آ جوڑجاڑی ڈٹ و کنسٹرکشن انڈسٹری نا بشخ اٹی برجاسرجزآتیان بروک آ دے تیٹی سیمنٹ نا ہندی کھپت اٹی پین ودکی نا اومیت ارے۔
