اسلام آباد۔ 03اپریل (اے پی پی) وزیراعظم عمران خان چیف آپریٹنگ آفیسر فیس بک شیرل سینڈ برگ انا کوشست آتا ستاءِ کرسا پارینے کہ نن لکھ آ خلقت نا زند ءِ گچین کننگ نا اسیجا مسخت آتے کن اواری اٹ کاریم کننگ اُن۔ داہیت ءِ او چیف آپریٹنگ آفیسر فیس بک شیرل سینڈ برگ انا فیس بک آ اسہ کلہواسے نا ورندی ٹی پارینے۔ داکان مست چیف آپریٹنگ آفیسر فیس بک شیرل سینڈ برگ وزیراعظم عمران خان نا آفیشل فیس بک آ تینا کلہو اٹی وزیراعظم عمران خان نا ستاءِ کرے و اونا منت واری ءِ ہرفسا پارے کہ نما شریداری آ نما منت وار اُٹ۔ نن پاکستان اٹی کوروناوائرس نا برخلاف جنگ اٹ خلقت نا کمک، معلومداری نا وخت آ و سہی فراوانی کن اواری اٹ کاریم کننگ اُن۔ وزیراعظم عمران خان دا کلہو نا ورندی ءِ ترسا تینا فیس بک اکاؤنٹ آ نوشتہ کرینے کہ کنے خوشی ءِ کہ نن لکھ آ بندغ نا زند اٹ گچینی نا اسیجا مسخت آتے کن اواری اٹ کاریم کننگ اُن۔ اومیت ءِ نی گچین کاریم کننگ اُس۔ نا ٹیم انا نمان کاریم و نا کمکاری نا منت واری ءِ ہرفیوہ۔ وزیراعظم عمران خان نا وژن نا رداٹ فیس بک و واٹس ایپ نا کمک اٹ کورونادین اٹ گام گیج آتا بابت گچین، سہی و وخت آ معلومداری فراوان کننگ انگ ءِ ہراڑآن پاکستان اٹ ہر بندغ ءِ کرونا وائرس نا بابت سہی ، پت انا قابل و تازہ معلومداری ہندی ذریعہ نا کمک اٹ مفت تننگ انگ ءِ۔ وزیراعظم عمران خان و فیس بک نا چیف آپریٹنگ آفیسر شیرل سینڈ برگ اینخو نا سال ڈٛیووس اٹ جہانی اقتصادی فورم نا وخت آ اوڑدہی کریسر ہراڑے وزیراعظم عمران خان پاکستانی ڈل انا کماشی ءِ کریکہ۔
