وزیرخارجہ مخدوم شاہ محمود قریشی نا انڈونیشیائی ہم منصب رتنومارسودی ءِ ٹیل فون

اسلام آباد۔ 03اپریل (اے پی پی) پاکستان و انڈونیشیاکروناوائرس نا دین انا انسداد کن او آئی سی و اقوام متحدہ نا پلیٹ فارم نا کمک اٹ اسیجاکوشست آتے کاریم اٹ اتنگ آ امنا و سلابتی چرجوئی ءِ برجاتخنگ نا فیصلہ ءِ کرینو۔ وزیر خارجہ مخدوم شاہ محمود قریشی جمعہ نادے آ انڈونیشیانا وزیر خارجہ رتنومارسودی تون ٹیل فون آ رابطہ کرے۔ ترجمان دفترخارجہ نا رداٹ ہڑتوم آ وزیرخارجہ غاتا نیام اٹ کروناوائرس نا تالانی ءِ تونگ و داجہانی چیلنج اتون گچین وڑاٹ مون تننگ نا بابت سرجم گپ وتران مس۔ وزیرخارجہ دا جہانی دین انا سوب آن انڈونیشیا ٹی مروک آ جان نسخان تیا پاکستان نا کنڈآن انڈونیشیا نا حکومت و الس تون است ہسونی نا درشانی ءِ کرے۔ وزیر خارجہ دادین انا تالانی ءِ توننگ کن انڈونیشیا نا کنڈآن کروک آ وخت آ گام گیج آتا ستاءِ کرے۔ وزیر خارجہ دا دین انا تالانی ءِ توننگ کن ،پاکستان نا کنڈآن کروک آ کوشست آتیان معلومدار کرسا پارے کہ نن ہم انڈونیشیا آنبار، دا مشکل وخت اٹی توازن ءِ برقرار تخنگ نا کوشست کننگ اُن اسہ کنڈآ نن دا دین انا تالانی ءِ توننگ کن، راجی فاصلہ ءِ تینا کننگ آ زور شاغنگ اُن وخت اس کہ ایلو کنڈ زرگزران نا پہیہ ءِ حرکت اٹ تخنگ کن گام گیج چست کننگ اُن۔ وزیر خارجہ پارے کہ دا دین انا چیلنج نا سوب آن جہانی زرگزران آبھاز بے چیٹ زہم تمنگ ءِ وخت اس کہ کم وسیلہ غاتا حامل ملک آتے داآفت تون مون تننگ اٹ شدید مشکلات پیش بننگ ءِ۔ ہندارداٹ وزیراعظم عمران خان دا مشکل ساہت اٹ شون پذیر ملک آتا زرگزران تے سیبو تننگ کن ‘‘وام تا ری اسٹرکچرنگ نا سلاہ تسنے تانکہ دا ملک آک تینا وسیلہ غاتے دا جہانی دین انا تالانی ءِ توننگ و نہادی انسانی جان تے بچفنگ کن کاریم اٹ اتنگ کیر۔ شاہ محمود قریشی پارے کہ داوخت آ غٹ اہم فورم تیا ننا سلاہ غا سجفنگ انگ ءِ۔ شون پذیر ملک آتازرگزرانی بحالی کن داوخت آ جہانی بینک، آئی ایم ایف ، جی20و یورپی یونین، کون آ فورم تیٹٛی ہندافتیا سجفنگ انگ ءِ۔ وزیر خارجہ انڈونیشیا نا وزیر خارجہ ءِ دا دینی رداٹ، مقبوضہ جموں وکشمیر نا تشویشناک حالیت آتیان معلومدار کرسا پارے کہ بھارت مقبوضہ جموں و کشمیر اٹی 80لکھ بے گناہ بندغ آتے کرفیو نا کمک اٹ گھیڑ کرینے گرج داہیت انا ءِ کہ دا بے سوب گھیڑ انا چٹفنگ کن بھارت آ زورشاغنگے تانکہ کودک کشمیری تے خور و دوائی نا فراوانی ممکن مننگ کے۔ انڈونیشیا نا وزیر خارجہ پاکستان اٹی خوانوک آ انڈونیشین طالب علم آتا خیال ءِ تخنگ آ حکومت پاکستان نا منت واری ءِ ہرفے۔ ہڑتوم آ وزیر خارجہ غاک کوروناوائرس نا دین انا انسداد کن او آئی سی و اقوام متحدہ نا پلیٹ فارم نا کمک اٹ اسیجا کوشست آتے کاریم اٹ اتنگ آ امنا کرسا سلابتی چرجوئی ءِ برجاتخنگ نا فیصلہ ءِ کریر۔