اسلام آباد۔ 03اپریل (اے پی پی) صدر مملکت ڈاکٹر عارف علوی پارینے کہ ڈکھیا انسانیت نا خذمت اسہ عظیم ءُ نیکی اسے، تھیلیسیمیا نا گواچی چناک ہرافتا زند دتر نا عطیہ غاتا سیبو آمریک، اوفتے کوروناوائرس نا ساڑی آحالیت آتارداٹ نظردتر نا عطیہ دوبفننگ نا سوب آن مشکلات مون تروک ءِ، دتر نا عطیہ تروک آتا است بڈی ءِ کننگے۔ داخیال آتا درشانی ءِصدر مملکت جمعہ نادے آ ایف نائن پارک اٹ جوڑ تھیلیسیمیا سینٹر نا دورہ ءِ کننگ نا وخت آ گپ وتران اٹی کرے۔ صدر مملکت تھیلیسیمیا نا گواچی چناتے تون اوڑدہی کرے و اوفتا طب انا ہریفے۔ صدر مملکت سینٹر آ فرض سرانجام تروک ڈاکٹر آتون ہم اوڑدہی کرے و زہمی چناتیٹی ٹیکی ہم بشخا۔ داوخت آ پاکستان بیت المال انا منیجنگ ڈائریکٹر عون عباس بپی صدر مملکت ءِ تھیلیسیمیا ہند اٹ کروک آ گام گیج آتیا حوال تس۔ صدر مملکت داوخت آ تران کرسا پارے کہ پاکستان بیت المال، سندس فاؤنڈیشن و اسلام آباد پولیس نا گام گیج آک سفت نا قابل ءُ۔ تھیلیسمیا نا گواچی چناک ہرافتا زند دترنا عطییہ غاتا سیوب آمریک ، کوروناغان ودی مروک آ حالیت آتا سوب ننے اوفتا بھاز فکر ئس۔ اوپارے کہ ہرام ٹرانسپورٹیشن ہم بندءِ، ہرابندغ آک دترنا عطیہ کریرہ اوہم سرمننگ کتورہ۔ صدر مملکت پارے کہ ہرابندغ آک دتر نا عطیہ کیرہ اوفتا است بڈی ءِ کننگے۔ اوپارے کہ زہمی تا کمک ءِ کننگ کن دتر نا عطیہ بھاز المی ءِ۔ صدر مملکت اسہ وار ولدا کلہو تس کہ کوروناغان ودی مروک آ حالیت آتے ٹی ملنگ ءِ کم تخر، پاکستان زوت دا حالیت آتیان پیش تمک۔ داوخت آ اسلام آباد پولیس نا ورناک تھیلیسیمیا ہند اٹ دترنا عطیہ تسر۔
