ترجمان دفترخارجہ عائیشہ فاروقی نا ہفتہ وار بریفنگ

اسلام آباد۔ 02اپریل (اے پی پی) ترجمان دفترخارجہ عائشہ فاروقی کوروناوائرس نا دین اتون مون تننگ اٹ چین نا کنڈآن امداد و کمکاری نا ستاءِ کرسا پارینے کہ دا دین اتون مون تننگ کن ننا اجتماعی کوشست آک پاک چین سدابہار سٹریٹجک کمکاری نا اسہ پین شاہدی اسے۔ پنچ شنبے نادے آ ہفتہ وار بریفنگ اٹی ترجمان پارے کہ چین کورونامریض آتے کن جتاءُ ہسپتال اس جوڑ کننگ کن 40لکھ ڈالرفراوان کرینے وخت اس کہ چندی چینی تنظیم تا کنڈآن کم و ود 30لکھ ڈالرنا مالیت نا کمکی گڑااتسا اسہ پین جہاز اس پنچ شنبے نادے آ پاکستان آ سرمسنے۔ ترجمان پارے کہ دا کمکی گڑاک وینٹی لیٹر، ماسک و ٹیسٹنگ کٹس آتیا تالان ءُ۔ ترجمان پارے کہ شون پذیر ملک آتے کن وام تیٹی ریلیف نا غرض اٹ وزیراعظم عمران خان نا خواست نا جہانی کہول آ مثبت ردعمل نا درشانی ءِ کننگانے۔ ترجمان پارے کہ یورپین وزراء خارجہ نا ویڈیو کانفرنس، آئی ایم ایف، جہانی بینک و جی۔20سروک دیوان اٹی شون پذیر ملک آتا امداد نا معاملہ ءِ شرہ ٹی اتنگانے۔ ترجمان پارے کہ پاکستان دا گام گیج آتے پک کیک و دافتے سہی سمت اٹ درست ءُ گامگیج اس گوندک۔ ترجمان پارے کہ پاکستان داوخت اسکان قطر، دبئی، سعودی عرب وتھائی لینڈ اٹ اختہ پاکستانی تے ملک آ گدریفینے۔ ترجمان پارے کہ استنبول، کوالالمپور، تاشقند، باکو، بغداد، لندن و ٹورنٹو آن ہم پاکستانی تا پدی اتنگ کن ڈٹ ءِ حتمی دروشم اس تننگانے۔ ترجمان اسہ وار ولدا بھارتی حکومت آ زور شاغاکہ او مقبوضہ کشمیر اٹی پابندی تے ہرفے و کشمیری الس نا جان جوڑی و ایلو المی آ آسراتی تسکان رسینگ ءِ پک کے۔