وزیراعظم عمران خان نا کوروناوائرس نا حالیت آتا بابت جاچ دیوان اٹی گپ وتران

اسلام آباد۔ 02اپریل (اے پی پی) وزیراعظم عمران خان بنجائی دارالحکومت اٹی کاریم کروک آ غٹ ڈاکٹرز و طبی عملہ کن اسہ تُو انا ودکی تنخواہ نا اصولی منظوری ءِ ترسا پارینے کہ دا مشکل وخت و بے چیٹ حالیت آتے ٹی انسانیت نا خذمت تون سرشار ڈاکٹر و طبی عملہ نا جوزہ و خذمت آک ستاکڑزرہ۔ داہیت ءِ او پنچ شنبے نادے آ کوروناوائرس نا حالیت آتا بابت جاچ دیوان نا کماشی ءِ کرسا پارے۔ دیوان اٹی وزیر اقتصادی امور محمد حماد اظہر، وزیر نیشنل فوڈ سیکورٹی مخدوم خسروبختیار، وزیر ڈٹ بندی اسد عمر، خصوصی کمکار حوالکاری ڈاکٹر فردوس عاشق اعوان، خصوصی کمکار جان جوڑی ڈاکٹر ظفراللہ مرزا، خصوصی کمکار ڈاکٹر معید یوسف ، چیئرمین این ڈی ایم اے لیفٹیننٹ جنرل محمد افضل، وزیراعظم نا فوکل پرسن کوروناڈاکٹر فیصل سلطان و ایلو سینئر آفیسر آک ساڑٛی ئسر۔ خصوصی کمکار جان جوڑی ڈاکٹر ظفراللہ مرزا وزیراعظم ءِ ملک اٹ کروناوائرس نا تازہ انگا حالیت آتیان معلومدارکرے۔ وزیر ڈٹ بندی اسد عمر کروناوائرس نا حالیت آتارداٹ زرگزرانی و انتظامی گام گیج خاص کر صوبہ سندھ آن بلوچستان و ءِپنجاب ءِ خولم نابلاتعطل ترسیل، صنعتی یونٹ آتا روانی، سی پیک ڈٹ آتیا عملدرآمد ، بنجا و صوبہ غاتانیام اٹ کوآرڈینیشن نا گچینی وکورونانا بابت پک ڈیٹا یکجا کننگ نا بابت کروک آ گام گیج و اوفتیا پیش رفت انا بارواٹی سرجم حوال تس۔ دیوان اٹی فیصلہ کننگاکہ نیشنل کوارڈینیشن کمیٹی نا بروک آ دیوان نا رداٹ کثیر الضابطہ ریسرچ کمیٹی اس جوڑ کننگک ہرا چندی بشخ آتا بابت تینا سلاہ و سوج آتے مرتب کرسا نیشنل کوارڈینیشن کمیٹی نا مون آ پیش کیک تانکہ دا سلاہ و سوج آتے ٹی کمیٹی آخبت نا لائحہ عمل نا تعین ءِ کننگ کے۔ پک ڈیٹا نا بابت ہیت کرسا وزیراعظم پارے کہ ساڑی حالیت آتے ٹی درست و راستکی تیا مبنی ڈیٹانا دوئی کننگ بے کچ اہمیت تخک۔ اوپارے کہ سہی ڈیٹا نا فراوانی نا بابت ڈیوالائی ءِ سگنگ پننگک۔وزیراعظم پارے کہ کورونانا توننگ نا بابت چندی ملک آتے ٹی کروک آ گام گیج آتاہم پدریسہ جاچ ءِ ہلنگ انگ ءِ تانکہ ملکی حالیت و واقعہ غاتارداٹ گچین گام گیج چست کننگ مرے۔ وزیراعظم پارے کہ پاکستان اٹی حالیت آک دنیا غان جتاءُ۔ داڑے ننا مقابلہ بیرہ کوروناتون آخا بلکن نیزگاری و بے روزگاری تون ہم ارے۔ اوپارے کہ ہرفیصلہ ءِ ڈغاری راستکی تے مون آ تخسا کننگک۔ چیئرمین این ڈی ایم اے وزیراعظم ءِ کورونانا تشخیص کن درکار میڈیکل آسراتی، کٹس، وینٹی لیٹرز وایلو ازباب آتا دوئی کننگ و دا چرجوئی ٹی کروک آ گام گیج آتا تازہ انگا حالیت آتیا حوال تس۔ وزیراعظم ءِ پاننگاکہ بنائی وڑاٹ نجی بشخ انا اِرالیبارٹری تے این ڈی ایم اے نا کنڈآن ٹیسٹ انا ازباب فراوان کننگ انگ ءِ تانکہ ٹیسٹ انا خڑچ آتے ٹی خاطرخواہ کمتی اتنگ مرے۔ دا آزموندہ ءِ مون آ تخسا دا آسراتی ءِ پین چانڑدہ لیبارٹری تیٹی فراوان کننگک۔ وزیراعظم بنجائی دارالحکومت اٹ کاریم کروک آ غٹ ڈاکٹرز و طبی عملہ کن اسہ تُو انا ودکی تنخواہ نا اصولی منظوری ءِ تس۔ وزیراعظم پارے کہ دا مشکل وخت و بے چیٹ حالیت آتے ٹی انسانیت نا خذمت کروک ڈاکٹر و طبی عملہ ناجوزہ و خذمت آک ستاکڑزرہ۔ اوپارے کہ حکومت جان جوڑی نا بشخ اتون وابستہ دا مسیحا تا غٹ تر گرج آتے اولیتی بنداو تیا پورو کننگ کن سنبرینگوک ءِ۔