وزیراعظم کوروناریلیف ٹائیگر فورس انا رجسٹریشن نا باقاعدہ بناءِ کننگا، عثمان ڈار

اسلام آباد۔ 01اپریل (اے پی پی) وزیراعظم نا خصوصی کمکار امور نوجوانان عثمان ڈار پارینے کہ وزیراعظم کوروناریلیف ٹائیگر فورس انا رجسٹریشن نا باقاعدہ بناءِ کننگانے۔ رجسٹریشن نا بنامننگ تون مچ آ ملک آن 90ہزار ورناٹائیگرز پروگرام اٹی رجسٹرڈ مسر۔ وزیراعظم آفس اٹ کنٹرول روم اس جوڑ و مانیٹرنگ ٹیم تے جوڑ کننگانے۔ عثمان ڈار تینے ہم ٹائیگر فورس اٹی رجسٹرڈ کرفے۔ چارشنبے نادے آوزیراعظم نا خصوصی کمکار عثمان ڈار وزیراعظم آفس اٹی جوڑ کنٹرول روم انا دورہ ءِ کرے۔ اوکان پد وزیراعظم نا خصوصی کمکار عثمان ڈار تینا ویڈیو کلہو اٹی پارے کہ مچ آ ملک انا ورناتے کن سیٹیزن پورٹل آ رجسٹریشن ءِ اوپن کننگانے۔ ورناک وزیراعظم عمران خان نا ٹائیگر فورس اٹ بشخ ہلنگ کیرہ۔ ورناتیان خواستءِ کہ جعلی فارم آرجسٹریشن کرفپس۔ اوپارے کہ رجسٹریشن نا عمل بیرہ پاکستان سیٹیزن پورٹل نا کمک اٹ مریک، خصوصی کمکار پارے کہ اوتینے ہم ٹائیگر فورس اٹ رجسٹرکرینے۔ خوشی ءِ کہ ای وزیراعظم نا ریلیف ٹائیگر فورس اٹ بشخ ہلکونٹ۔ داکان بیدس چیف آرگنائزرپاکستان تحریک انصاف سیف اللہ خان نیازی زموار وکارندہ غاتا پن خصوصی پارت نامہ اس جاری کرینے ہراٹی مچ آ ملک اٹی تحریک انصاف نا غٹ کہول انا زمواروکارندہ غاتے کروناٹائیگر فورس اٹ بشخ ہلنگ نا پارت کننگانے۔ چیف آرگنائزر پاکستان تحریک انصاف سیف اللہ خان نیازی تینا بیان اٹی پارینے کہ وزیراعظم عمران خان کروناٹائیگر فورس انا ٹہیفنگ نا پڑو ءِ کرینے۔ پاکستان تحریک انصاف نا مچ آ ملک اٹی کارندہ و زموارآک مون آ برسا وزیراعظم نا توار آ لبیک پار۔ کارندہ و زموارآک وزیراعظم نا کروناٹائیگر فورس اٹ بشخ ہلیر۔ اوپارے کہ ٹائیگر فورس اٹ اوار مرسا تحریک نا کارندہ و زموارآک کورونانا برخلاف جہاد اٹ اوار مریر۔ کارندہ و زموار آک فورس اٹ اوار مرسا منظم وڑٹ کرونانا برخلاف ضلعی انتظامیہ نا دوتے سبک کیر۔ سیف اللہ خان نیازی پارے کہ بحیثیت قوم کرونا کون آ امتحان اٹی سرسہب مننگ ممکن ءِ، اللہ کریم پاکستان و اونا السءِ تینا حفظ و امان اٹ تخے و وزیراعظم نا کماشی ٹی ننا کوشست آک بارآور ثابت مریر۔