کوروناوائرس نا جہانی دین پاکستان تون اوار ایلو شون پذیر ملک آتے 25کھرب ڈالرنا سپورٹ پیکج نا گرج مریک، اقوام متحدہ نا ادارہ واپار و شونداری نا رپورٹ

اسلام آباد۔ 01اپریل (اے پی پی) پاکستان تون اوار ایلو شون پذیر ملک آتا زرگزران تے کوروناوائرس نا جہانی دین آن بھلو دک اس لگانے، زرگزرانی نسخان آتون مون تننگ کن شون پذیر ملک آتے 25کھرب ڈالر نا سپورٹ پیکج نا گرج مریک۔ اقوام متحدہ نا ادارہ واپار و شونداری(یو این سی ٹی اے ڈی) نا رپورٹ نارداٹ پاکستان، ارجنٹائن وافریقی ملک آتے کورونانا دین انا سوب آن ودوک آ وام، افراط زر اٹی ودکی تون اوار جان جوڑی نا بشخ اٹی بھاز ویل آتون مون تروک مریک۔ شون پذیر ملک آتا زرگزران آک درملکی زرکاری نا ملک آن پیش تمنگ تون اوار جہانی کہول آ نہاد آتے ٹی کمتی آن برآمد آتے ٹی کمتی و کرنسی نا نہاد آتے ٹی کمتی کون آ ویل آتیان زہمی مننگ کیک دُن کہ 2008 ء نا تنکی ٹی ہم مسوسس۔ یو این سی ٹی اے ڈی نا ڈائریکٹر گلوبائزیشن اینڈ ڈویلپمنٹ سٹریٹجیز رچرڈ کوزل رائٹ پارینے کہ جہانی ادارہ غاتے رپورٹ اٹ پیش کروک آ سلاہ تیا خوڑتی اٹ سجفوئی مریک تانکہ شون پذیر ملک آتا زرگزران ءِ مست آن سرمروک آ نسخان و آخبت نا نسخان تیان رکھ فراوان کننگ مرے۔ اوپارے کہ کوروناوائرس نا جہانی دین انا سوب شون پذیر ملک آتا زرگزران ءِ 20آن 30کھرب ڈالر نا نسخان مون تروک مریک۔ رپورٹ نارداٹ شون پذیر ملک آتیان فروری ومارچ اٹی 59ارب ڈالر نا درملکی زرکاری پیش تمانے وخت اس کہ 2008ء نا تنکی آن زرکاری نا انخلاء 26.7ارب ڈالر ئسک۔ جہانی ادارہ مستی پارینے کہ شون پذیر ملک آتے اینخو سال 25کھرب ڈالرنا سپورٹ پیکج نا گرج مریک۔ رپورٹ نارداٹ اینخو سال اٹی دا ملک آتے ٹی کیپیٹل مارکیٹ اٹ دہ کھرب ڈالر نا زرکاری ، وام تا پدی تننگ نا بابت دہ کھرب ڈالر نا سپورٹ پیکج و جان جوڑی نا بشخ اٹی کمکاری کن 5کھرب ڈالر نا کمکاری نا گرج ءِ۔ شون پذیر ملک آتے ٹی 170ملک آک اوار ءُ ہرافتے ٹی پاکستان ہم اوار ءِ۔ جی 20ملک آتے جہانی زرگزران نا سیبو و شون پذیر ملک آتے زرگزرانی تنکی نا مون ءِ توننگ کن تینا کڑد ءِ ادا کروئی مریک۔