اسلام آباد/واشنگٹن۔ 01اپریل (اے پی پی) جہانی مالیاتی فنڈ (آئی ایم ایف) نا انتظامی بورڈ 10کھرب ڈالر نا پوسکن آ ہڑتوم آ کنڈآتا وام معاہدہ نا منظوری ءِ تسنے، اوکان پد آئی ایم ایف نا باسک ملک آتون اوار کوروناوائرس آن زہمی ملک آتے وام و کمکاری نا فراوانی نا کسر اٹ اڑاند آک مرمسنو۔ داہیت ءِ جہانی مالیاتی فنڈ انا منیجنگ ڈائریکٹر کرسٹالیناجوارگیوابورڈ انا دیوان آن پد ٹویٹر آ جاری بیان اٹی پارینے۔ اوپارے کہ باسک ملک آک آئی ایم ایف نا وام تننگ نا کچ ءِ اسہ ٹریلین ڈالر اسکان ودفنگ نا منظوری ءِ تسنےاوکان پد آئی ایم ایف باسک ملک آتے کوروناوائرس نا دین اتون مون تننگ و داکان بیدس ایلو مد اٹی کمک فراوان کننگ نا قابل مسنے۔ اوپارے کہ جہانی مالیاتی فنڈ پڑک 20ملک آتاکوروناوائرس تون مون تننگ نا دا ڈٹ انا پورومخ تفی ءِ کیک ہراٹی جان جوڑی نا نظام ءِ سوگو کننگ، جہانی معیشت ءِ سوگو کننگ کن مربوط و ہدف آ مبنی زرگزران نا بحالی کن گام گیج آتا ڈٹ بندی ءِ کننگانے۔ داکان بیدس آئی ایم ایف نا کنڈآن جاری مروک آ بیان اٹی پاننگانے کہ آئی ایم ایف نا انتظامی بورڈ پوسکن آ ہڑتوم آ کنڈوام تا فریم ورک انا منظوری ءِ تسنے اوکان پد آئی ایم ایف نا وام تننگ نا کاریم نا کچ اسہ ٹریلین ڈالر اسکان ودک۔ بیان اٹی پاننگانے کہ دا گام گیج آتیان پد آئی ایم ایف نا باسک ملک آتے کوروناوائرس نا جہانی دین اتون مون تننگ کن وام تا فراوانی ممکن مریک۔ وام تا فراوانی نا چرجوئی یکم جنوری 2021آن بناکیک۔ پوسکن آ فریم ورک انا وخت ءُ پاس انا نظام مسہ سال آتیاٹی ءِ، ہرا 2023ء ٹی ایسر مریک ولے داٹی اسہ سال انا ودکی نا گنجائشت تخنگانے۔
