اسلام آباد۔ 01اپریل (اے پی پی) وزیر خارجہ مخدوم شاہ محمود قریشی سعودی ہم منصب شہزادہ فیصل بن فرحان السعود ءِ ٹیل فون کرے۔ چارشنبے نادے آ وزارت خارجہ نا کنڈآن جاری بیان نا رداٹ ہڑتوم آ وزیر خارجہ غاتا نیام اٹ کروناوائرس نا تالانی ءِ توننگ و داجہانی چیلنج اتون مون تننگ نا بابت سرجم گپ وتران کننگا۔ وزیر خارجہ مخدوم شاہ محمود قریشی کوروناوائرس نا دین انا سوب سعودی شاری تا جانی نسخان آ ڈکھ و است ہسونی نا درشانی ءِ کرسا تینا سعودی ہم منصب تون ہڑزخواہی کرے۔ وزیرخارجہ سعودی عرب نا کنڈآن کوروناوائرس نا تالانی ءِ توننگ کن کروک آ وخت آ گام گیج آتا ستاءِ کرے۔ وزیر خارجہ دا جہانی دین انا تالانی ءِ توننگ کن پاکستان نا کنڈآن کروک آ کوشست آتیان سعودی وزیر خارجہ ءِ معلومدار کرے۔ وزیر خارجہ تینا سعودی ہم منصب ءِ کوروناجہانی دینی چیلنج اتون مون تننگ کن سعودی عرب نا کنڈآن جی۔20ورچوئل سمٹ نا سرسہب اڈتننگ آ مبارکبادی تس۔ وزیر خارجہ پارے کہ دا جہانی دین انا چیلنج اتون مون ترسا پاکستان کون آ کم وسیلہ تخوک شون پذیر ملک آتے شدید زرگزرانی مشکل آتامون تروک مننگ ءِ ہنداخاطرآن وزیراعظم عمران خان شون پذیر ملک آتا وام تے ری اسٹرکچر کننگ نا سلاہ تسنے تانکہ او تینا وسیلہ غاتے دا دینی چیلنج اتون مون تننگ و نہادی انسانی جان تے بچفنگ کن کاریم اٹ اتنگ کیر۔ وزیر خارجہ مخدوم شاہ محمود قریشی سعودی عرب نا دارالحکومت ریاض و جیزان آ میزائل جلہو نا ترندی اٹ مذمت ءِ کرسا سعودی دفاعی فوج انا کڑد انا ستاءِ کرے ہرافک وخت آ دا جلہو ءِ تورسا نہادی انسانی جان و ملکیت آتے نسخان آن بچفیر۔ وزیر خارجہ پاکستان نا کنڈآن مملکت سعودی عرب و برادر الس تون یکجہتی نا درشانی ءِ کرسا مملکت نا سلامتی و جغرافیائی سالمیت آ ہروڑنا جارحیت نا برخلاف سعودی عرب نا پورو مخ تفی و کمکاری نا عزم انا درشانی ءِ کرے۔ سعودی وزیر خارجہ شہزادہ فیصل بن فرحان کوروناجہانی دین انا سوب مروک آ جانی نسخان آ ہڑزخواہی کننگ، سعودی عرب نا دارالحکومت ریاض و جیزان آ میزائل جلہو آتا برخلاف اصول موقف تینا کننگ و سعودی حکومت و الس تون یکجہتی نا درشانی ءِ کننگ آ وزیر خارجہ نا منتواری ءِ ہرفے۔ سعودی وزیر خارجہ شہزادہ فیصل جی۔20ورچوئل سروکی دیوان ناسرسہب اڈتننگ آ وزیر خارجہ مخدوم شاہ محمود قریشی نا کنڈآن تروک آ مبارکبادی آ منت واری ءِ ہرفے۔ سعودی وزیر خارجہ وزیر خارجہ مخدوم شاہ محمود قریشی ءِ معلومدار کرے کہ ساڑی جہانی دینی چیلنج انا رداٹ کچ اٹ زرگزرانی وسیلہ تخوک ملک آتا وام تا ری اسٹرکچرنگ نا سلاہ تون اوار شون پذیر ملک آتا زرگزرانی کمکاری نا بھاز انگا پہلو تے جی۔20ورچوئل سروکی دیوان اٹی سجفنگا۔ ہڑتوم آ وزیر خارجہ غاک دا جہانی چیلنج اتون مون تننگ و تین پہ تینی کمکاری ءِ مون آ دننگ کن سلابتی چرجوئی ءِ برجاتخنگ نا فیصلہ ءِ کریر۔
