وزیر خارجہ مخدوم شاہ محمود قریشی نا کماشی ٹی دیوان، 4اپریل آ جہانی فلائٹ آتا بحال مننگ نا حالیت اٹ لائحہ عمل اس جوڑ کننگ آ سلابت

اسلام آباد۔ 01اپریل (اے پی پی)وزیر خارجہ مخدوم شاہ محمود قریشی نا کماشی ٹی چارشنبے نادے آ وزارت خارجہ ٹی کورونادین انا چیلنج اتون مون تننگ نا بابت بڑزکو کہولی دیون اس اڈہلک ۔ دیوان اٹی پیشن نا ملک آتے ٹی وطن آ پدی بننگ ناچاری پاکستانی تا مرحلہ وار وطن آ پدی اتنگ ءِ ممکن کننگ کن چندی پہلو تا جاچ ءِ ہلنگا۔ دیوان اٹی بنجائی وزیر ہوابازی غلام سرورخان، خصوصی کمکار اوورسیز پاکستانیز سید ذوالفقار بخاری، خصوصی کمکار نیشنل سیکورٹی ڈاکٹر معید یوسف، سیکرٹری خارجہ سہیل محمود، سیکرٹری ہوابازی ڈویژن حسن ناصر جامی و وزارت خارجہ نا سینئر کمامدارآتون اوار بڑزکو عسکری کمامدارآک ہم ساڑی ئسر۔ وزیر خارجہ پارے کہ داکان مست اڈ ہلوک آ مسہ دیوان اٹی نن وزارت جان جوڑی، ایوی ایشن اتھارٹی، اوورسیز ڈویژن، نیشنل انسٹی ٹیوٹ آف ہیلتھ، پی آئی اے و ایلو تعلقدار ادارہ غاتیان سلاہ ہلکن و دا سلاہ تیا سرجم سلابت کننگا۔ اوپارے کہ ننا اولیکو اولیت پاکستان آ پدی بننگ نا چاری مچ آ دنیا ٹی بالی پٹ آتیا اختہ خلقت ءِ پدی اتنگ ناءِ۔ ہندامسخت کن نن وزارت خارجہ ٹی دمدستی وڑاٹ کرائسز مینجمنٹ سیل اس جوڑ کرین ہرا مچ آ دنیا ٹی پاکستانی سفارت خانہ غاتون پدریسہ رابطہ ٹی ءِ، و نن تون داوخت آ پیشن نا ملک پاکستانی تا پورو حساب وکتاب ارے۔ شاہ محمود قریشی پارے کہ نن ٹیسٹ فلائیٹ آتیا غٹ پروٹوکول آتے آزموندہ کرین۔ تھائی لینڈ آن بروک آ ٹیسٹ فلائیٹ آن 170مسافر اتنگا و او غٹ ءِ ٹیسٹ کننگا الحمد اللہ غٹ انا غٹ نیگیٹو ئسر۔ وزیر خارجہ پارے کہ ننے بالی پٹ آتیا کوروناپازیٹو کیس آتے کن قرنطینہ تون اوار ایلو طبی آسراتی تا فراوانی ءِ پک کننگ ناءِ۔ داوخت آ بھاز انگا ملک آتے ٹی لاک ڈاؤن نا سوب آن فلائٹ آُپریشن آک معطل ءُ۔ پی آئی اے نا کنڈآن دا بابت کروک آ تیاری تا بابت دیوان اٹی بشخ ہلوک آتے حوال تننگا۔ وزیر خارجہ پارے کہ ٹیسٹنگ و قرنطینہ آسراتی تا بابت ننا کاریم نا کچ اٹی پدریسہ ودکی مننگ ءِ ولے ایلو کنڈ ننے دین آن زہمی بندغ آتا کچءِ ہم مون آتخوئی مریک۔ دیوان اٹی 4اپریل آ جہانی فلائٹ آتا بحال مننگ نا حالیت اٹ لائحہ عمل اس جوڑ کننگ نا بابت سرجم سلابت مس۔ دادیوان اٹی امنائی وڑاٹ مون آ بروک آ سلاہ تے نیشنل کوآرڈینیشن کمیٹی نا بروک آ دیوان اٹی منظوری کن پیش کننگک۔