اسلام آباد۔ 31مارچ(اے پی پی) وزیراعظم عمران خان دا عزم ءِ دُوارہ کرینے کہ اسہ کنڈ الس ءِ کروناوائرس دین آن بچفنگ و ایلو کنڈ الس ءِ بین، و بے روزگاری آن ہم رکھ تخنگ ناءِ، بنجائی کابینہ قومی رابطہ کمیٹی نا فوڈ سپلائی کن گڈزٹرانسپورٹ ءِ ملنگ نا فیصلہ غا سندھ حکومت نا کنڈآن عملدرآمد کپننگ آ است جم مفننگ نا درشانی ءِ کرے و رینجرآتے پارت کننگانے کہ او قومی رابطہ کمیٹی نا فیصلہ غاتیا اونارداٹ عملدرآمد ءِ پک کننگے، وزیراعظم عمران خان کوروناوائرس آن زہمی خلقت نا تذلیل و بدسلوکی نا نوٹس ءِ ہلسا پارت کرے کہ کوروناوائرس نا مریض آتون جوانی اٹ پیش بننگے، بنجائی کابینہ 1200ارب نا زرگزرانی ریلیف پیکج و 700بلین نا ہدف دوئی کننگ کن سکوک بانڈ انا بناءِ کننگ نا منظوری ءِ تس، بنجائی کابینہ ریلوے، پی آئی اے ، ایف بی آر و ایکس چیکر آ بھاریم مروک آ ادارہ غاتے اصلاحات نا کمک اٹ تینا نت تیا سلفنگ، ای گورننس آ عملدرآمد ءِ پین گچین کننگ نا پارت کرے، کابینہ اپوزیشن لیڈرنا تنقید و دوبہ غاتے مسترد کرسا پیدوار کرے کہ وزیراعظم، بنجائی کابینہ و پی ٹی آئی سرکڑدہ غاک زمواری تیان معلومدار ءُ، داوخت سیاست نا اف، اگہ اپوزیشن لیڈر گچین خوارہ تو کست و قصور نا عینک آتے دڑفسا پین گچین گام گیج آتے کن سلاہ ایتر۔ سے شنبے نادے آ وزیراوعظم نا کماشی ٹی بنجائی کابینہ نا دیوان آن پد وزیراعظم نا خصوصی کمکار حوالکاری وشینکاری ڈاکٹر فردوس عاشق اعوان میڈیا بریفنگ اٹی پارے کہ وزیراعظم عمران خان کورونانا ساڑی آ حالیت آتا بابت کابینہ ءِ پت اٹ ہلک و کوروناغان بچنگ و دانا منفی زہم تے توننگ و منفی زہم تیان بچفنگ کن چست کروک آ گام گیج آتیان معلومدار کرے۔ بنجائی کابینہ نا دیوان اٹی قومی رابطہ کمیٹی نا دیوان اٹی داوخت اسکان کروک آ فیصلہ و اونا الس آ تموک آ زہم تا جاچ ءِ ہلک۔ اوپارے کہ بنجائی کابینہ ءِ وزیر جان جوڑی ظفرمرزا و ڈاکٹر فیصل کوروناوائرس نا تازہ انگا حالیت آتا بابت حوال ترسا پارے کہ داوخت اسکان پاکستان اٹی کورونا وائرس نا پک 1865کیس ءُ دافتیان 49درسد بندغ ایران آن وخت اس کہ 18درسد ایلو ملک (عمرہ، یورپ یا ایلو ملک) آتیان بس وخت اس کہ 33درسد کوروناوائرس نا ہندی منتقلی نا کیس ءُ، داوخت اسکان کوروناوائرس پازیٹو نا 98بندغ جان جوڑ، 25زوال، 12کوروناوائرس مریض وینٹی لیٹرز آٹو، وخت اس کہ 58ءِ قرنطینہ غان اُراغا گدریفنگانے۔ وزیراعظم عمران خان کابینہ ءِ پارے کہ کوروناوائرس نا جم حالیت آتا ہڑدے نا بنداو آ جاچ ءِ ہلنگ آن پد پالیسی مرتب کرسا الس ءِ دانا زہم تیان معلومدار کننگ کن لائحہ عمل اس پیدوار کننگک۔ وزیراعظم کابینہ ءِ دا حالیت آتے اِراوڑاٹ ایسر کننگ نا حکمت عملی نا بارواٹی پت اٹی ہلساکوروناوائرس دین آن بچفنگ و رکھی تدابیر و داڑتون اوار گنڈوک گام گیج ہرا الس نا گچینی کن ہر چار آصوبائی حکومت بشمول آزاد جموں وکشمیر گلگت بلتستان حکومت آتا تین پہ تین سلابت اٹ کروک آ فیصلہ، کروناوائرس نا گواچی پاکستانی شاری تا زند آ رونما مروک آ زہم و حکومت نا کانٹیجنسی پلان آف ایکشن آن معلومدار کرے۔ بنجائی کابینہ 1200ارب نا وزیراعظم زرگزرانی ریلیف پیکج ءِ پک کرے۔ وزیراعظم عمران خان دا وخت آ داعزمءِ دُوارہ پارے کہ نن اسہ کنڈ الس ءِ کروناوائرس دین انا مرض آن بچفنگ و داہیت آ نظرشاغوئی ءِ کہ نیزگاری نا شیفکو کہول آ زند ءِ تیر کروک آتا بین و افلاس و بے روزگاری نا دوتے اٹ قتل مف، بنداوی گرج انا گڑاتا فراوانی آ ہچ وڑنا قدغن اس بف۔
