اسلام آباد۔ 31مارچ(اے پی پی) بنجائی وزیر اقتصادی امور حماد اظہر پارینے کہ کورونانا دین انا برخلاف جنگ اٹی بنجاء و صوبہ غاک اسہ پنہ غاٹو، غٹ باندات آتے سلابت اتون طے کننگ انگ ءِ، مچ آ ملک اٹی المی آ گڑاتا بے اڑاند ترسیل تون اوار ویلیو چین ءِ برجاتخنگ ءِ ہم پک کننگ انگ ءِ، اقتصادی پیکج اٹی شاری و صںعت آتے ریلیف تننگانے۔ سے شنبے نادے آ داڑے بنجائی وزیر ڈٹ بندی اسد عمر و وزیراعظم نا خصوصی کمکارجان جوڑی ڈاکٹر ظفر مرزا تون اوار اسیجا پریس بریفنگ اٹی اوپارے کہ وزیراعظم عمران خان کوروناوائرس نا دین اتون مون تننگ کن ہراریلیف پیکج نا پڑو ءِ کریسس اوڑآ عملدرآٰمد نا بناءِ کننگانے، درو اقتصادی رابطہ کمیٹی خصوصی دیوان اٹی دانا منظوری ءِ تسنے، دا پیکج راج انا نزور تپہ و ہموصںعت آتے کن اہمیت تخک ہراکروناوائرس نا دین انا سوب آن زہمی مسنو۔ اوپارے کہ پیکج نا رداٹ وام و سود انا ادائیگی ٹی 6تُو تاخیر نا آسراتی تننگانے، حقدار آتا کچ ءِ ودفسا اسہ کروڑ 20لکھ کننگانے ہرافتے کفالت پروگرام و ضلعی انتظامیہ نا سفارش آ نغد امداد تننگک، نغد امداد 4تُواسکان نا وخت اکن تننگک۔ اوپارے کہ پیکج نا رداٹ صنعتی بشخ انا ہڑدے ئی مزور آتے کن نغد مالی کمکاری نا رداٹ 200ارب روپئی تخنگانے، کیش امداد ہڑدے ئی اجرت کروک آ ہمو مزور آتے تننگک ہراکرونانا دین آن بے روزگار مسنو،دا کیٹگری ٹی 30لکھ ورکرز آتا کساس ءِ ہرافتے 17500روپئی ماہانہ نا کچ اٹ ادائیگی کننگک۔ اوپارے کہ راج انا نزور و کم کٹیا کروک تپہ غاتے کنوئی آ گڑاتے رعایتی نرخ آتیا تننگ نا رداٹ یوٹیلیٹی اسٹورزکارپوریشن کن پیکج اٹ 50ارب روپئی تخنگانے۔ حماد اظہر پارے کہ 300یونٹ آن کم بجلی کاریم اٹ اتوک آ صارف، ہرا کل صارف آتا 70درسد ءِ، ءِ بل آتا ادائیگی ٹی مسہ تُو انا آسراتی وزیراعظم نا پیکج اٹ اوار ءِ۔ اوپارے کہ پیکج اٹ کورونا وائرس اٹی زہمی مروک آ صنعت آتے کن خصوصی ترغیب و مراعات نا پڑو ءِ کننگانے، ہرافتے ٹی سیلز خراج وانکم خراج ری فنڈز، ڈیوٹی ڈرابیک، و کسٹمزڈیوٹیز نامد اٹی 10سال آن پد سلوک ادائیگی تے پک کننگ کن فیڈرل بورڈ آف ریونیو کن 75ارب روپئی، گرانٹ ٹیکسٹائل نا برآمد کنندگان آتے ڈیوٹی ڈرابیک نا مد اٹی فنڈ آتا فراوانی و ایلو ترغیب آک اوار ءُ۔ بنجائی وزیر پارے کہ نن خوانہ کہ صںعت کار آک تینا ملازم خاص کر ہڑدے ئی اجرت آ کاریم کروک آ مزور آتا خیال ءِ تخر و او بے روزگاری نا گواچی مفس۔ اوپارے کہ ننا ہدف ءِ کہ لاک ڈاؤن نا سوب آن نئے بیرہ پیدوار نا عمل برجاسلے بلکن اوفتا بلارکاوٹ ترسیل و فراوانی ءِ ہم پک کننگے، تدوک آ مسہ چار دے آن ننا غٹ صوبائی چیف سیکرٹری تتون ویڈیو لنک انا کمک اٹ رابطہ مریک و سلابت اتون فیصلہ کننگ انگ ءِ، نن امنائی اٹ نئے بیرہ تیار کنندگان بلکن ریٹیل نا کہول آ فہرست آتے تیارکرینن تانکہ المی آگڑاتا فراوانی ءِ پک کننگ مرے۔ حماد اظہر پارے کہ کورونانا برخلاف جنگ اٹ نن غٹ اسہ پنہ غاٹن، ننا کوشست ءِ کہ پیداواری عمل برجاسلے و صںعت آتے نئے بیرہ خام مال نا فراوانی بلکن ہموڑے کسبکار و ایلو افرادی قوت اسکان سرکننگ ءِ ہم پک کننگے۔ اوپارے کہ سندھ اٹی مزور و کسب کار آتے پیداواری یونٹ آتسکان سرکننگ نا گڑاس غاو ملاسس، ہراڑآ صوبائی حکومت تون رابطہ کننگا و صوبائی حکومت و انتظامیہ دا ویل آتے دمدستی وڑاٹ ایسر کننگ نا باوری کرفینو۔ اوپارے کہ ملک اٹی اناج نا کاختی اف، حکومت حالیت آتیا پورو نظر تخانے۔
