ملتان۔ 31مارچ(اے پی پی) وزیرخارجہ مخدوم شاہ محمود قریشی نا کماشی ٹی سرکٹ ہاؤس اٹی کوروناوائرس و انصاف امداد پیکج نا بابت خصوصی دیوان اس اڈ ہلک۔ دیوان اٹی صوبائی وزیر توانائی ڈاکٹراختر ملک و ضلع نا غٹ قومی و صوبائی اسمبلی نا باسک آک بشخ ہلکر وخت اس کہ ڈپٹی کمشنر عامر خٹک ہم ساڑی ئس۔ وزیر خارجہ مخدوم شاہ محمود قریشی دیوان آن تران کرسا پارے کہ حکومت جہانی و قومی کہول آ کوروناوائرس نا دین انا خوڑتی اٹ جاچ ءِ ہلنگ ءِ ، دامسخت کن خصوصی سیل اس جوڑ کننگانے، کوروناوائرس تون مون تننگ کن وزیراعظم عمران خان اِرا سب کمیٹی ٹہیفینے، کنا کماشی ٹی جوڑ کمیٹی جہانی کہول آ رابطہ غاتے ٹی اختہءِ و آئی ایم ایف، ورلڈ بینک و ایشین بینک انا وام تے ری شیڈول کرفنگ کن کوشست کننگ انگ ءِ ، وزیر خارجہ پارے کہ دا پیسہ غاتے کوروناوائرس آن ودی مروک آ تنکی نا سوب آن کجان جوڑی نا بشخ آ خڑچ کننگک، حکومت یورپی یونین، جی 77و جی20ملک آتا وزیرخارجہ غاتون رابطہ ٹی اُن، وزیر خارجہ پارے کہ ایران آ پابندی تے چٹفنگ کن پاکستان تینا کڑد ءِ ادا کننگ ءِ، پابندی تا سوب آن ایران پیسہ مننگ آن پد ہم وینٹی لیٹر ہلنگ کپک، وزیر خارجہ پارے کہ پیشن نا ملک پاکستانی تتون ہم رابطہ کننگ انگ ءِ، اوپارے کہ ایلو سب کمیٹی ءِ بنجائی وزیر اسد عمر نا کماشی ٹی جوڑ کننگانے ، دا کمیٹی لاک ڈاؤن و فوڈ سپلائی نا جاچ ءِ ہلنگ ءِ، اگہ پورو لاک ڈاؤن نا کنڈآ ہنوئی تما تو داڑکن تیاری نا گرج مریک ولے دانافیصلہ ءِ وائرس نا ٹرینڈ ءِ ہُننگ آن پد کننگک۔ وزیر خارجہ پارے کہ چین ووہان صوبہ ٹی 6کروڑ خلقت ءِ لاک ڈاؤن کرے و آن لائن فوڈ سپلائی کن 45ہزار ورکرز آتے موبلائز کننگا۔ وزیر خارجہ پارے کہ ننے پورو لاک ڈاؤن اٹ کن وخور، راشن خلقت نا اُراتیا سرکروئی مریک، خولم نا فصل تیار ءِ ، روتنگ و ہلنگ نا عمل کاٹم آٹے، دا غٹ حالیت آتے ہرسا تیاری کننگ انگ ءِ،شاہ محمود قریشی پارے کہ پنجاب نا غٹ آن بھلا و گچین قرنطینہ ملتان اٹ جوڑ کننگانے، گچین بست و بند آ ڈپٹی کمشنر عامرخٹک و اونا ٹیم ءِ مبارکباد پیش کیوہ، وزیر خارجہ پارے کہ وزیراعظٰم نا پڑوکروک کروناریلیف ٹائیگر فورس انا چرجوئی ٹی اولیکو دیوان ہم ملتان اٹ مننگ ءِ، مربوط رابطہ کار انا بنداو آ کوروناریلیف ٹائیگر فورس انا سرسہبی نا ضمانت ءِ تننگ مریک۔ اوپارے کہ ہریونین کونسل 6وارڈآتیاتالان ءِ۔ ہریونین کونسل اٹی 13باسکی کوروناریلیف ٹائیگر فورس اس جوڑ کننگک و ہروارڈ آن اِرابندغ ہلنگک ہرافتا کماشی ءِ اسہ فوکل پرسن اس کیک۔ ٹائیگر فورس انا ورناک اُرااُراغان ہڑدے اجرت آ کاریم کروک و دیہاڑی دار تپہ نا پن، شناختی کارڈ فون نمبر و ایڈریس ءِ رجسٹرڈ کیرہ۔ فورس انارضارکار آک نیزگار تپہ غاتا لسٹ آتے ضلعی انتظامیہ ءِ ایترہ۔ ضلعی انتظامیہ و پارلیمنٹرینز کمکاری ءِ مون آ درسا وزیراعظم نا دا انقلابی گام ءِ مون آ دیرہ۔ اوپارے کہ پنجاب حکومت نا انصاف امداد پیکج نا رداٹ آن لائن میسج نا کمک اٹ دیہاڑی دار تپہ تینا پنءِ ، شناختی کارڈو فون نمبر ءِ میسج نا کمک اٹ رجسٹرڈ کرفنگ کیرہ۔ مچ آ ڈیٹا پنجاب انفارمیشن ٹیکنالوجی بورڈ انا کنڈآ کاہک ہرادانا ویری فیکیشن ءِ کیک۔ دا بے کچ شفاف وڑوڈول انا رداٹ حقدار آتا تعین ءِ کیک۔ اوپارے کہ وزیراعظم عمران خان مشکل حالیت آتیان پد ہم قوم ءِ 1200ارب روپئی نا تاریخی ریلیف پیکج اس تسنے۔ ننا اصول اٹ دا دین انا اواری اٹ مقابلہ ءِ کروئی مرے۔ ولے مخالف سیاسی جماعت آک پوائنٹ سکورنگ اٹ اختہ ءُ۔ اسمبلی نا باسک ملک عامر ڈوگر، معذوم زین قریشی، ملک احمد حسن ڈیہڑ، ابراہیم خان، خصوصی کمکار جاوید اختر انصاری ، پارلیمانی سیکرٹری محمدندیم قریشی، ملک واصف راں، سلیم لابر، قاسم خان لنگاہ، ضلعی صدر پی ٹی آئی خالد جاوید وڑائچ و ملک اکرم کنوں ئسک بشخ ہلکر۔
