وزیراعظم عمران خان نا کماشی ٹی کوروناوائرس نا چیلنج نا رداٹ چندی بشخ آتے ٹی چست کروک آ گام گیج آتا بابت بڑزکو کہولی دیوان اس

اسلام آباد۔ 30مارچ(اے پی پی) وزیراعظم عمران خان پارت کرینے کہ مچ آ ملک اٹی بنداوی ضرورت نا گڑاتا دستیابی آ خصوصی نظر تخنگے، و داہیتءِ پک کننگے کہ ملک انا اسہ بشخ اسے ٹی ہم نُت، دال، برنج ، سی و بورہ پین پین کون آ بنداوی ضرورت نا گڑاتا کاختی مون تروک مف، بنجائی و صوبائی تعلقدار کمامدارآتیا تالان خصوصی کمیٹی اس جوڑ کننگے ہرا خور انا بابت حالیت آتا ہڑدے ئی بنداو آ جاچ ءِ ہلیر و سلاہ و سوج پیش کیر۔ دوشنبے نادے آ وزیراعظم عمران خان کوروناوائرس نا چیلنج نا رداٹ چندی بشخ آتے ٹی چست کروک آ گام گیج خاص وڑاٹ صںعت وواپار، تعمیرات، توانائی و خاص کر دا مشکل حالیت آتے ٹی نیزگاری نا گواچی بندغ آتے ریلیف تننگ نا بابت چست کروک گام گیج آتیا بڑزکو کہولی دیوان اسے نا کماشی ءِ کرے۔ دیوان اٹی وزیر ڈٹ بندی اسدعمر، وزیر اقتصادی امور حماد اظہر، وزیر توانائی عمر ایوب خان، وزیر نیشنل فوڈ سیکورٹی مخدوم خسروبختیار، سلاہکار خزانہ ڈاکٹر عبدالحفیظ شیخ، سلاہکار واپار عبدالرزاق داؤد، خصوصی کمکار حوالکاری و شینکاری ڈاکٹر فردوس عاشق اعوان ، خصوصی کمکار راجی رکھ ڈاکٹر ثانیہ نشتر، خصوصی کمکار توانائی ندیم بابرئسک ساڑی ئسر۔ دیوان اٹی گورنر اسٹیٹ بینک رضاباقر و تعلقدار ڈویژن نا سیکرٹریک ویڈیولنک انا کمک اٹ بشخ ہلکر۔ دیوان اٹی ساڑی حالیت آتارداٹ نزور تپہ ءِ ریلیف فراوان کننگ نا بابت چست کروک گام گیج آتیا خصوصی کمکار راجی رکھ ڈاکٹر ثانیہ نشتر وزیراعظم ءِ سرجم حوال تننگا۔ دیوان اٹی ملک اٹی گمانی حد اسکان صںعتی سرجزآتے برجاتخنگ نا بابت چست کروک گام گیج آتیا ہم گپ وتران کننگا۔ دیوان اٹی سلاہکار واپار پارے کہ وزیراعظم ناپارت نا رداٹ غٹ بھلا کارخانہ غاتا مالک آتے پارت کننگانے کہ کارخانہ غاتے ٹی کاریم کروک آ ملازم آتا تنخواہ تا تننگ ءِ پک کننگے۔ چنکا و نیامئی صںعت آتا ملازم آتا رکھ اکن گام گیج آتے تین پہ تینی سلابت اٹ حتمی دروشم اس تننگ انگ ءِ ۔ دیوان اٹی تعمیرات نا بشخ انا بابت آن حکومت نا کنڈآن تروک آ مراعات و گام گیج آتیا ہم سرجم سجفنگا۔ وزیراعظم نا پارت آ دامشکل ساہت اٹی جوڑکروک آ کوروناریلیف فنڈ اٹی پیشن نا ملک رہینگوک پاکستانی و ملک انا تہہ ٹی مخیر خواجہ غاتا اوار مننگ نا بابت وڑوڈول آ گورنر اسٹیٹ بینک حوال تس۔ دیوان اٹی تہہ و پیشن نا ملک محب وطن پاکستانی تا کنڈآن دا مشکل ساہت اٹی ملکی زرگزران ءِ سیبو تننگ نابابت وڑوڈول آہم سرجم سجفنگا۔ وزیراعظم گورنر اسٹیٹ بینک ءِ پارت کرے کہ دارداٹ تعلقدار ادارہ غاتون تین پہ تینی سلابت آن پد غٹ تر سرجم و وڑوڈول آتے پگہ اسکان پیش کننگے۔ دیوان اٹی توانائی نا بشخ اتون تعلقدار باندات و خاص کر ساڑی حالیت آتارداٹ ملکی و الس نا فائدہ غاتا رکھ اکن داوخت اسکان چست کروک آ گام گیج آتا بابت حوال ہم تننگا۔ دیوان اٹی فیصلہ کننگاکہ خولم نا روتنگ ناسیزن ءِ مون آ تخسا خولم نا روتنگ تون وابستہ بندغ آتا ہن و بر اٹی آسراتی فراوان کننگ نا گام گیج آتے زوت حتمی دروشم اس تننگے۔ دیوان اٹی فیصلہ کننگاکہ زرگزران نا پہیہ ءِ برجاتخنگ کن درکار صںعت آتا فہرست مرتب کننگک ہراڑکن حکومت نا کنڈآن المی کمکاری فراوان کننگک تانکہ صنعتی عمل کم آن کم زہمی مرے۔ وزیر اقتصادی امور پارے کہ ساڑی حالیت آتارداٹ 93انٹرنیشنل این جی اوز ءِ ملک اٹی شش تُو اکن کاریم کننگ نا موکل تننگانے وخت اس کہ پین 53ادارہ غاتا درخواست آ سجفنگ انگ ءِ ہراڑآ زوت فیصلہ کننگک۔ دا فیصلہ ءِ داخاطرآن ہلنگانے تانکہ انٹرنیشنل این جی اوز ءِ دا مشکل ساہت اٹی رفاحی کاریم تیٹی ہچ ءُ مشکل اس پیش بف۔ وزیراعظم وزارت فوڈ سیکورٹی، صںعت وواپار، اقتصادی امور و وزارت خزانہ ءِ پارت کرے کہ دا وزارت آتے ٹی چاہندار آتیا تالان تھنک ٹینک اس ٹہیفنگے ہراہڑدے نا بنداو آ حالیت آتا جاچ ءِ ہلے و غٹ المی گام گیج آتے کن سلاہ و سوج پیش کے۔ دیوان آن تران کرسا وزیراعظم پارے کہ اینو ملک ءِ اسہ ہندن ءُ حالیت آتا مون تروک ءِ ہرافتا مستین اٹی ہچ ءُ مٹ اس ملیپک۔ اوپارے کہ دا مشکل حالیت آتے ٹی حکومتی ادارہ غاتا پین متحرک کڑدادا کننگ ناگرج ءِ۔ اوپارے کہ حکومت ہمو غٹ گام گیج آتے چست کیک ہرافتیان الس و ہر بشخءِ دا مشکل ساہت اٹی گمانی ریلیف فراوان کننگ مرے۔ وزیراعظم پارے کہ کوروناتون اوار اوار ننے نیزگاری کون آ بھلو چیلنج آتا مون تروک ءِ ۔ وزیراعظم پارے کہ حکومت نزور تپہ غاتے ریلیف فراوان کننگ کن غٹ تر وسیلہ غاتے کاریم اٹ اتیک۔