انسانی جان آن ود ہچ ءُ گڑاس اف، لاک ڈاؤن آ عمل کننگپک تو کرفیوخلوئی تمک، وزیراعظم آزاد کشمیر راجہ فاروق حیدر نا ویڈیو کلہو

اسلام آباد۔ 30مارچ(اے پی پی) وزیراعظم آزاد کشمیر راجہ فاروق حیدر خان الس ءِ خبڑدار کرینے کہ او بے گرج اُراتیان پیش تمنگ آن پاناد کیر ورنہ بھلو جرمانہ اس کننگک، انسانی جان آن ود ہچ ءُ گڑاس نہادی اف، لاک ڈاؤن آ عمل کننگپک تو کرفیو خلوئی تمک، حکومت نا کنڈآن راجی ملنگ آپابندی کن اختیار کروک احتیاطی تدابیر نا پابندی ءِ کیر۔ دوشنبے نادے آ داڑے جاری تینا ویڈیو بیان اسے ٹی او آزاد کشمیر نا الس ءِ پارینے کہ بحیثیت وزیراعظم الس نا جان و مال انا رکھ اونا زمواری ءِ۔ انسانی جان آن ود ہچ ءُ گڑاس نہادی اف۔ شاریک بے گرج بازار تیا ہِننگ آن پاناد کیر، ہر اُرانا اسہ بندغ اس تین تون شناختی کارڈ ءِ تخسا سودا ہلنگ کن مارکیٹ آ ہِننگ کیک۔ اوپارے کہ وزیراعظم پاکستان تون اواری اٹ دافیصلہ ءِ کننگانے کہ مال بردارگاڈی تا ہن و بر آ پابندی مفک ہنداخاطرآن ضرورت نا گڑاتا ہچ ءُ کاختی اس مفک۔ اوپارے کہ الس لس ناجوڑی یا کوروناوائرس آن زوال کروک آ ہربندغ نا جنازہ غاہِننگ آن پاناد کیر۔ انتئے کہ داوڑکرسا اوچندی جنازہ غاتا بست و بند ءِ کرور۔اوپارے کہ نن آزاد کشمیر ءِ پاکستان تون ملفوک آ کسرتے بند کرینن کنا تینا ایڑھ داسوب آن آزاد کشمیر آ بننگ کتو۔ ہنداخاطرآن الس ہراڑے اریر ہموڑے مریر۔