اسلام آباد۔ 30مارچ(اے پی پی) وزیراعظم نا خصوصی کمکار حوالکاری و شینکاری ڈاکٹر فردوس عاشق اعوان پارینے کہ جان جوڑی نا بشخ انا شونداری کن گام گیج آک حقی قومی خذمت ءُ۔ راستکی بیان کننگ آ اپوزیشن سیخ آنبار خیسن مریک، حساب وکتاب ءِ پک کننگ اُن کہ جان جوڑی نا بشخ انا شونداری مستین نا حکمران تا اولیت آتے ٹی الوکہ۔ بیرہ پن انا تختی خلنگا، پاکستان نا الس نا جان جوڑی وزیراعظم عمران خان نا اولیت ءِ۔ دوشنبے نادے آ تینا ٹویٹ اٹی خصوصی کمکار ڈاکٹر فردوس عاشق اعوان پارے کہ پاکستان تحریک انصاف نا حکومت نا جان جوڑی کن بجٹ اٹی ودکی دا اہم بشخ انا سوگوی کن ننا سنجیدہ و مخلصانہ کوشست آتا شاہدی ءِ، کورونانا چیلنج اتون مون تننگ کن غٹ تر وسیلہ غاتے کاریم اٹ اتنگ انگ ءِ۔ قومی کوشست آتے سوگوی ترسا ان شاء اللہ دانامون ءِ تورنہ۔ اوپارے کہ ضرورت نا گڑاو راشن و حقدار بندغ آتا اُراتیا سرکننگ کن ہراڑے وزیراعظم عمران خان ورناتے گچین کرے ہموڑے مخیر خواجہ غاتا خذمت آتے ہم اوار کننگ نا فیصلہ ءِ کرینے ، دا جوزہ و وسیلہ غاتا جوان امتزاج مریک۔ ورناک ملک اٹی بدلی ناہراول دستہ جوڑ مریر تو مخیر خواجہ غاک مدام الس نا فلاح کن تینا است ءِ ملانو۔ کور کمیٹی دیوان اٹی اسہ ایپ اس درستی راستی کرفنگ نا فیصلہ مس ہراڑے مخیر خواجہ و خیراتی ادارہ غاک رجسٹرڈ مریرہ تانکہ السی فلاحی نا کوشست آتے ہم گرنچ کرسا شیفکو تپہ اسکان راشن و کنوئی آ گڑاتا بشخنگ ءِ وخت آ و منصفانہ وڑاٹ سرکننگ مرے۔
