اسلام آباد۔ 30مارچ(اے پی پی) ایشیائی شونداری بینک (اے ڈی بی) کروناوائرس تون مون تننگ نا کوشست آتا رداٹ پاکستان کن پین اِرا ملین ڈالر نا گرانٹ نا منظوری ءِ تسنے۔ دا گرانٹ گرانٹ آتے ایشیاء بحرالکاہل ڈیزاسٹررسپانس فنڈ آن تنگک و دافتیان طبی ہلہلہ ئی سامان و ازباب، طبی عملہ کن جندی رکھ انا ازباب، تشخیصی لیبارٹریز و اوفتے ٹی کاریم اٹ اتوک آ گڑاو ایلو ازباب آتے ہلنگک۔ 20مارچ آ اے ڈی بی پاکستان ءِ کروناوائرس تون مون تننگ کن 5لکھ ڈالر نا گرانٹ نا منظوری ءِ تسوسس، دا پیسہ غاتے اقوام متحدہ نا ادارہ یونیسیف نا کمک اٹ طبی ازباب آتا ہلنگ کن کاریم اٹ اتنگ انگ ءِ۔ ایشیائی شونداری بینک انا کنڈآن جاری مروک آ بیان نا رداٹ کروناوائرس تون مون تننگ کن بینک انا کنڈآن پاکستان کن دا بنائی کمک ءِ و دا چرجوئی برجاسلک۔ بینک انا کنٹری ڈائریکٹر ژیاوہانگ ینگ پارینے کہ کوروناوائرس نا دین انا سوب آن پاکستان آ بھاریم تمانے ننے اونا احساس ءِ، بینک کرونانا برخلاف جنگ اٹی پاکستان تون کمکاری نا چرجوئی ءِ برجاتخک۔ اوپارے کہ داکمکاری آن پاکستان اٹی کرونانا پیدواری، تشخیص و انفیکشن نا مون ءِ توننگ نا پاکستان نا کچ اٹی گچینی بریک۔ جہانی ادارہ جان جوڑی نا خواست آ اے ڈی بی باسک ملک آتے ٹی المی طبی ازباب و سازوسامان تا آسان ہلنگ اٹ کمک فراوان کننگ ءِ۔ بینک بنائی وڑاٹ باسک ملک آتے کن 6.5ارب ڈالر نا کمکاری نا پڑو ءِ کرینے۔
