اسلام آباد۔ 30مارچ(اے پی پی) وزیرخارجہ شاہ محمود قریشی پارینے کہ کرونا جہانی دینی چیلنج اتون مون تننگ کن ننا کاریم نا کچ اٹی پدریسہ ودکی مننگ ءِ، داہیت ءِ او دوشنبے نادے آ وزارت خارجہ ٹی کورونادینی چیلنج اتون مون تننگ نا بابت بڑزکو کہولی دیوان نا کماشی ءِ کرسا پارے۔دیوان اٹی پیشن نا ملک آتے ٹی پدی بننگ نا چاری پاکستانی تا مرحلہ وار وطن آ پدی اتنگ ءِ ممکن کننگ کن چندی پلو آتا جاچ ءِ ہلنگا۔ بنجائی وزیر ہوابازی غلام سرورخان، وزیراعظم نا خصوصی کمکار جان جوڑی ڈاکٹر ظفر مرزا ، خصوصی کمکار اوورسیز پاکستانی سید ذوالفقار بخاری، خصوصی کمکار نیشنل سیکورٹی ڈاکٹر معید یوسف، سیکرٹری خارجہ سہیل محمود، وزیراعظم نا خصوصی کمکار ڈیجیٹل پاکستان تانیہ ادریس ، سیکرٹری ہوابازی ڈویژن حسن ناصرجامی، ایگزیکٹو ڈائریکٹر این آئی ایچ جنرل عامر اکرام، سی ای او شوکت خانم ڈاکٹر فیصل سلطان و وزارت خارجہ نا سینئر کمامدارآک دیوان اٹی بشخ ہلکر۔ وزیر خارجہ پارے کہ وزیراعظم عمران خان نا کماشی ٹی نیشنل کوآرڈینیشن کمیٹی نا دیوان اٹی دا اہم ویل آ سرجم سلابت مس۔ کوروناوائرس نا پیشن ناملک آتیان پاکستان آ گمانی بننگ نا خطرہ ءِ توننگ کن نیشنل کوآرڈینیشن کمیٹی نا دیوان اٹی پیشن نا ملک آتیان بروک آ فلائٹ آتیا پابندی خلنگ نا فیصلہ ءِ کننگاسس۔ اوپارے کہ داوخت آ بھاز انگا ملک آتے ٹی لاک ڈاؤن نا سوب آن فلائٹس آپریشن معطل ءِ۔ خصوصی کمکار جان جوڑی ڈاکٹر ظفرمرزا پاکستان اٹی کوروناجہانی دین انا تالان مننگ نا ساڑی آ نوعیت و رسک اسسمنٹ نا بابت دیوان اٹی بشخ ہلوک آتے حوال تس۔ ایگزیکٹو ڈائریکٹر این آئی ایچ کرونا ٹیسٹنگ کاریم نا کچ و ایلو تیاری تا بابت دیوان نا بشخ ہلوک آتے معلومدارکرے۔ وزیر خارجہ پارے کہ الحمداللہ کروناجہانی دینی چیلنج اتون مون تننگ کن ننا کاریم نا کچ اٹی پدریسہ ودکی مننگ ءِ۔ دیوان اٹی 4اپریل آ جہانی فلائٹ آتا گمانی بحالی آن پد انالائحہ عمل آ سلابت کننگا۔ دادیوان اٹی امنائی وڑاٹ مون آ بروک آ سلاہ تے نیشل کوآرڈینیشن کمیٹی نا دیوان اٹی منظوری کن پیش کننگک۔
