ٹیکسلا۔30مارچ(اے پی پی) صدرمملکت ڈاکٹر عارف علوی دوشنبے نادے آ یونیورسٹی آف انجینئرنگ اینڈ ٹیکنالوجی ٹیکسلاٹی جوڑ قرنطینہ سینٹر نا دورہ ءِ کرے و کرونا نا ناجوڑ آتے کن ساڑی آسراتی تا جاچ ءِ ہلک۔ داوخت آ خاتون اول بیگم ثمینہ علوی ہم اوڑتون اوار ئسک۔ صدر مملکت قرنطینہ سینٹر اٹی جوڑ کنٹرول روم انا ہم دورہ ءِ کرے۔ صدر مملکت قرنطینہ سینٹر اٹی ساڑی طبی عملہ غان کوروناوائرس آن زہمی بندغ آتا خیالداری نا بابت معلومداری ہلک۔ ضلعی انتظامیہ نا کمامدارآک حوال ترسا صدر مملکت ءِ پاریر کہ دا قرنطینہ سینٹر اٹی کم و ود600بندغ تخنگ نا گنجائشت ءِ۔ دا ناجوڑ آتا خیالداری و اوفتے قرنطینہ ٹی غٹ آسراتی تے فراوان کننگ کن ہروڑنا گام گیج کننگانے۔ حوال اٹی پاننگاکہ قرنطینہ سینٹر اٹی ساڑی طبی عملہ ءِ ہم رکھی سامان فراوان کننگانے۔ صدر مملکت قرنطینہ سینٹر اٹی دوئی آسراتی تیا است جمی نا درشانی ءِ کرسا کورونا زہمی تا گچین وڑاٹ خیالداری ءِ پک کننگ نا پارت کرے۔ صدر مملکت نا دورہ ٹی راجی فاصلہ غا خصوصی چکار کننگا و غٹ احتیاطی تدابیر آتے اختیار کننگا۔
