اسلام آباد ۔ 28 مارچ (اے پی پی) کورونا سرا گرودارءِ ھاترا چین ءَ چہ طبی زانتکارانی ٹیمب ءُ کمکی سامان زرت ھاسیں فلائیٹ پاکستان ءَ سر بوتگ۔ چین ءِ حکومت ءِ نیمگا چہ کورونا ءَ گوں دیم دیگ ءِ ھاترا زانت ایر کنوکیں 8 باسکی ٹیمب ءُ کمکی سامان زرت ھاسیں فلائیٹ ھپتگ ءَ اسلام آباد ءَ سر بوتگ۔دری کارانی وزیر مخدوم شاہ محمود قریشی ءُ چیئرمین این ڈی ایم اے لیفٹیننٹ جنرل محمد افضل ءَ چینی مہماناں را وش اتک کتگ۔ پاکستان ءِ تہ چینءِ سفیر ھم اے موہ ءِ سرا ساڑی اتنت۔ این ڈی ایم اے ءِ ربالکارءِ گوشگ ءِ ردا چیئرمین نیشنل ڈیزاسٹر مینجمنٹ اتھارٹی ءَ اے ھوالہ چہ سرپد کتگ کہ کورونا ءِ ھلاپ ءَ چین ءَ پہ وھد ءِ سرا کمک سر کتگ۔مروچی آوکیں سامان ءِ تہ کورونا ءِ پجار ءِ یک لکھ پنچ ہزار ءَ چہ گیش کٹس ھوارانت۔ایشی ءِ ابید بیست لکھ ءَ چہ گیش ماسک ءُ 77 ہزار میڈیکل کور ھم دیم دیگ بوتگ ات۔ھاسیں فلائیٹ ءِ تہ 217 وینٹی لیٹرز ءُ 50ہزار میڈیکل دستانہ ھم ھوار انت۔ علی بابا فاونڈیشن ءُ جیک ما فاونڈیشن ءَ 50 ہزار ٹیسٹنگ کٹس ءُ 5 لکھ حفاظتی ماسک پاکستان ءَ را داتگ ات۔چین ءَ خنجراب ءِ وسیلگ ءَ دو ٹن ماسک، ٹیسٹ کٹس، وینٹی لیٹرز، طبی حفاظتی لباس ھم پاکستان ءِ ھوالہ کتگ ات۔ربالکارءِ گوشگ ءِ ردا زانتکارءِ اے ٹیمب دوھپتگ ءَ تاں پاکستانءِ تہ اوشت ایت۔
