کوروناوائرس نا دین اتون جوان وڑاٹ مون تننگ کن علاقائی کہول آ اسیجا حکمت عملی اس تینا کننگ نا گرج ءِ
اسلام آباد۔ 26مارچ(اے پی پی) وزیر خارجہ شاہ محمود قریشی پارینے کہ کوروناوائرس نا دین اتون جوان وڑاٹ مون تننگ کن علاقائی کہول آ اسیجا حکمت عملی اس تینا کننگ نا گرج ءِ ۔ وزیر خارجہ پنچ شنبے نادے آ بھوٹان نا تینا ہم منصب ڈاکٹر ٹانڈی ڈور جی تون ٹیل فون آ رابطہ کرے۔ ترجمان دفترخارجہ نا رداٹ شاہ محمود قریشی پارے کہ پاکستان کورونا دین انا معاملہ غا جامع سلابت کن سارک وزراء جان جوڑی ویڈیو کانفرنس اس اڈتننگ نا خواہندارءِ۔ اوپارے کہ پاکستان کوروناوائرس نا جہانی چیلنج تون مون ترسا زرگزرانی مشکل آتا سوب شون پذیر ملک آتا وام تا ری سٹرکچرنگ نا سلاہ ءِ تسنے۔ ہڑتوم آ وزیر خارجہ غاتا نیام اٹ کوروناوائرس نا تالانی ءِ توننگ و داجہانی چیلنج تون مون تننگ نا بابت چندی پہلو تیا سرجم گپ وتران مس۔ وزیر خارجہ شاہ محمود قریشی دا جہانی چیلنج اتون مون تننگ کن بھوٹان نا کنڈآن وخت آ چست کروک گام گیج آتا ستاءِ کرے۔ اوبھوٹان نا وزیر خارجہ ءِ دا جہانی دین انا تالانی ءِ توننگ کن پاکستان نا کنڈآن چست کروک گام گیج آتیان معلومدار کرے۔ اوپارے کہ پاکستان علاقائی کمکاری ءِ مون آدننگ کن سارک ءِ بے کچ اہم ءُ پلیٹ فارم اس تکک، کوروناوائرس نا جہانی دین اتون جوان وڑاٹ مون تننگ کن ننے اسیجا حکمت عملی اس تینا کروئی مریک۔ سارک باسک ملک آتا نیام اٹ دا سرحال آ جامع سلابت کن پاکستان ‘‘سارک وزراء جان جوڑی ویڈیوکانفرنس اس اڈتننگ نا خواہندارءِ۔ بھوٹان نا وزیر خارجہ پاکستان نا کنڈآن سلاہ ئی سارک وزراء جان جوڑی ویڈیوکانفرنس نا اڈتننگ ءِ جوان ءُ گام اس گوندا۔ وزیر خارجہ شاہ محمود قریشی پارے کہ دا جہانی دینی چیلنج اتون مون ترسا شون پذیر ملک آتے شدیدزرگزرانی مشکل آتا مون تروئی تمنگ ءِ ہنداخاطرآن نن سلاہ تسونن کہ شون پذیر ملک آتا وام تے ری سٹرکچر کننگے تانکہ ا وتینا وسیلہ غاتے نہادی انسانی جان تے بچفنگ کن کاریم اٹ اتنگ کیر۔
