اسلام آباد۔ 26مارچ(اے پی پی) وزیر خارجہ مخدوم شاہ محمود قریشی پارینے کہ پیشن نا ملک آتے ٹی رہینگوک پاکستانیک ننا میرات ءُ اوفتے ہروڑنا آسراتی تننگ ننا حکومت نا اولیت آتے ٹی اوار ءِ۔ داہیت ءِ او پنچ شنبے نادے آ وزارت خارجہ ٹی جوڑ‘‘ایمرجنسی کرائسز مینجمنٹ سیل’’ انا دیوان نا کماشی ءِ کرساپارے۔ سیکرٹری خارجہ سہیل محمود، اسپیشل سیکرٹری معظم علی خان، ترجمان وزارت خارجہ عائشہ فاروقی ووزارت خارجہ نا سینئر کمامدارآک دیوان اٹی بشخ ہلکر۔ دیوان اٹی جہانی دین انا چیلنج نا رداٹ، مچ آ دنیا ٹی ساڑی پاکستانی تے مون تروک مشکل و چندی جہانی بالی پٹ آتیا، وطن آ پدی بننگ نا چاری پاکستانی تا زوت وطن آ پدی بننگ کن چندی پلو آتیا سجفنگا۔ مچ آ دنیا ٹی ساڑی پاکستانی سفارت خانہ غاتا کمک اٹ، کرائسز مینجمنٹ سیل اٹی ملوک آ پاکستانی کمیٹی تا غاو/مشکل آتا ہم سرجم جاچ ءِ ہلنگا۔ سعودی عرب و ایران اٹی ساڑی زائر آتا مرحلہ وار زوت پدی اتنگ نا وڑوڈول آہم سرجم سلابت کننگا۔ دیوان اٹی چندی ملک آتے ٹی پدی بننگ نا چاری پاکستانی تے خصوصی جہاز آتا کمک اٹ پدی اتنگ نا آپشن آہم سجفنگا۔ وزیر خارجہ پارے کہ پیشن نا ملک آتے ٹی رہینگوک پاکستانیک ننا میرات ءُ۔ اوفتے ہروڑنا آسراتی فراوان کننگ ننا حکومت نا اولیت آتے ٹی اوار ءِ۔
