اسلام آباد۔ 26مارچ(اے پی پی) وزیر خارجہ مخدوم شاہ محمود قریشی پارینے کہ ننا سلاہ غا وام تا بھاریم اٹ ڈبینگوک ملک آتے وام تا زرتس اٹی آسراتی تا فراوانی و وام تے ری اسٹرکچر کننگ نا معاملہ غا جی۔20دیوان اٹی شرہ کننگک۔ داوخت اسہ ایلو ءِ شیف خلنگ نا اف دا بنجا وصوبہ غاتا وسیلہ و کوشست آتے یکجا کرسا پورو واک اتون داجہانی چیلنج اتون مون تننگ نا وختءِ ، ننے سپلائی چین ءِ معطل مننگ آن بچفوئی ءِ۔ پنچ شنبے نادے آ پارلیمانی راہشون آتا دیوان نا بابت بیان اٹی وزیر خارجہ پارے کہ درو اڈ ہلوک آ پارلیمانی دیوان ءِ وزیراعظم عمران خان نا پارت آ اسپیکر قومی اسمبلی بٹنگا۔ وزیراعظم داخوائسکہ کہ کورونانا برخلاف اسیجا لائحہ عمل اسے کن غٹ پارلیمانی راہشون آتون سلابت کننگے انتئے کہ دا سوشل آئسولیشن نا زمانہ ءِ چنانچہ ویڈیو لنک انا کمک اٹ پارلیمانی راہشون تے یکجا کننگے و اوفتے حکومت نا کنڈآن کروک آ گام گیج آتیا ہم پت اٹ ہلنگے۔ دا سلابتی دیوان کن تدوک آدے مسہ بجہ نا وخت پک مس اسپیکر قومی اسمبلی بلاول بھٹوتون ، شہباز شریف تون و مولانا فضل الرحمان تون تینٹ ہیت کرے ولے اوفتا دا دیوان اٹی بشخ ہلنگ نا بابت ابہام ئس۔ اوپارے کہ درووزیراعظم عمران خان کابینہ نا دیوان اٹی سرجم حوال تس۔ میٹنگ نا چٹنگ آن پد نن اوڑآن خواست کرین کہ نی پارلیمانی راہشون تا دیوان اٹی ہم بشخ ہڷ۔و اوفتے ہم داغٹ سرجم آتیان معلومدار کے۔ وزیراعظم عمران خان ننا درخواست ءِ امنا کرے و تینا اختہ ئی تے موقوف کرسا ویڈیولنک انا کمک اٹ پارلیمانی راہشون تا دیوان اٹی بشخ ہلک۔ پارلیمانی راہشون تا دا دیوان پونے چار گھنٹہ برجاسلیس نن خصوصی کمکار جان جوڑی ڈاکٹر ظفر مرزا و چیئرمین این ڈی ایم اے آن سرجم حوال ترفین نن غٹ راہشون تا سلاہ تے بنگن و ای تینٹ اوفتا کنڈآن چست کروک آ اعتراض آتے نوٹ کریٹ و دیوان نا ایسر آ اوفتا ورندی ءِ ہم تسٹ۔ دیوان نا بناکننگ آن زرس پد بلاول بھٹو زرداری و شہباز شریف بش مسر ہنار کہ وزیراعظم اوفتا ہیت ءِ خفتوتو، ای اوفتیان خواست کریٹ کہ داوخت اعتراض کننگ نااف ، نن بایدے یکجہتی نا درشانی ءِ کین، ای منت وار اُٹ کہ اوفک کنا خواست ءِ منار و ولدا دا دیوان دُوارہ برجاسلیس۔ شاہ محمود قریشی پارے کہ داوخت اسہ ایلو ءِ شیف خلنگ نا اف دا بنجا و صوبہ غاتا وسیلہ و کوشست آتے یکجا کرسا پورو واک اتون دا جہانی چیلنج تون مون تننگ نا وخت ءِ۔ کناعلم اٹی بس کہ 23مارچ آ یورپی یونین نا وزیر خارجہ غاتا ہلہلہ ئی دیوان مننگ ءِ، ای وزیراعظم نا پارت آ بذریعہ چھٹی یورپی ملک آتیان خواست کریٹ کہ دا جہانی دین انا رداٹ ہموملک آک ہراوام تا بھاریم اٹ ڈبینگوک ءُ اوفتے اگہ وام تا زرتس اٹی آسراتی فراوان کننگے و وام تے ری اسٹرکچر کننگے تو اوفتے دا دین اتون مون تننگ اٹ کمک رسینگک۔ ننا سلاہ غا اوفک پاریر کہ جی ۔20نا دیوان اٹی نن دا معاملہ ءِ شرہ کینہ۔ ورلڈ بینک اناصدر و آئی ایم ایف نا منیجنگ ڈائریکٹر ئسک ہم داہیت ءِ اہمیت تسنو، سیکرٹری جنرل اقوام متحدہ ہم پارینے کہ ننے آؤف داباکس ایسر نا کنڈاہنوئی ءِ۔
