اسلام آباد۔ 26مارچ(اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ پوسکن آ ٹیکنالوجی ءِ کاریم اٹ اتسا چِل آن زیات شاری آسراتی شاری تے اوفتا درگہ اسکان سرکننگ وزیراعظم عمران خان نا الس دوست حکومت نا وژن نا عملی شاہدی ءِ، الس نا خذمت آ مبنی سنبرینگوک نظام نا ٹہیفنگ وزیراعظم عمران خان نا اصل مسخت ءِ۔ پنچ شنبے نادے آ خصوصی کمکار ڈاکٹر فردوس عاشق اعوان تینا ٹویٹ اٹی پارے کہ وزیراعظم عمران خان نا یکتاایپ انا بناءِ کننگ نا گام گیج پوسکن آ ٹیکنالوجی نا کمک اٹ شاری تا آسراتی تیٹی ودکی کننگ نا شاہدی ءِ، دا ایپ شاری تے اوفتا اُراتیٹی اوفتا ویل آتا ایسر نا کسر ءِ آوار کننگ اٹ کمکار مریک، الس ءِ سرکاری دفتر آتا چکر ءِ خلوئی تمپک، تینا گرج آتا پوروی کن آن لائن رابطہ کننگ کیرہ۔ اوپارے کہ مچ آ قوم ءِ کوروناوائرس نا چیلنج اتون مون تننگ کن اسٹ مروئی ءِ ، ہر بندغ ءِ کڑد اداکروئی ءِ۔ اوپارے کہ دا ایپ انا سوب شاریک ہر فارمیسی ٹی ماسک انا کمتی یا کبین بہا کننگ نا پیدواری ءِ کننگ کیرہ ۔ دا ایپ غٹ تعلقدار ادارہ غاتے ٹی کوارڈینیشن و ہم گرنچی ءِ مون آدیک۔ داکان بیدس داٹی ای پولیسنگ، ایمرجنسی سروسز، ڈومیسائل ، شناختی کارڈ، ڈغاری فرد، سلہہ لیسن، گاڈی تا رجسٹریشن ، ٹوکن خراج آتا زرتس، پیدائش و ڈٛیتھ سرٹیفیکیٹ آتا جاری و ایلو چندی آسراتیک ہم اوار ءُ۔
