وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان
اسلام آباد۔ 25مارچ(اے پی پی) وزیراعظم ناخصوصی کمکار حوالکاری و شین کاری ڈاکٹر فردوس عاشق اعوان پارینے کہ وزیراعظم عمران خان نا حکومت ہروخت الس کن سجفک، ملک و قوم انا راجی آسراتی و اوفتا گچینی ننا مسخت ءِ ، وزیراعظم عمران خان کورونا نا چیلنج اتون مون تننگ کن جامع قومی حکمت عملی اسے نا پڑو ءِ کرینے، کھرب آ روپئی نا پیکج عمران خان نا تینا قوم و غریب الس کن احساس نا شاہدی ءِ، وزیراعظم راج انا غٹ تپہ غاتے مون آ تخسا گام گیج ہرفینے، زرگزرانی راستکی و قوم ءِ مون تروک ویل آتے مون آ تخسا دااسہ بے کچ گچین ءُ پیکج اسے۔ چارشنبے نادے آ وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان تینا ٹویٹ اٹی پارے کہ مزور تپہ کن 200ارب و راج انا بے کچ نیزگار بندغ آتے کن 150ارب نا زَر تخنگانے، برآمد کنندگان آتے 100ارب روپئی نا دمدستی ریفنڈ تننگ آن برآمد کنندگان آتا کمک مریک و داڑآن ملکی زرگزران آ جوان ءُ زہم اس تمک۔ چنکا صنعت و کشت وکشار کن 100ارب آن پیداواری لائخی ءِ ودفنگ اٹ کمک رسینگک، یوٹیلٹی اسٹورتیکن 50ارب روپئی نا زر انا مسخت الس ءِ اڑزان و آب اٹ گڑاتا فراوانی ءِ پک کننگ ءِ۔ اوپارے کہ لاک ڈاؤن نا حالیت آتے کن 100ارب و خولم نا سرکاری ہلنگ کن 280ارب روپئی تخنگانے۔ اوپارے کہ پٹرولیم مصنوعات آتیا 15روپئی فی لیٹر کم کرینے، دا غٹ گام گیج آتیان پیدوار مریک کہ وزیراعظم عمران خان نا حکومت ہروخت الس کن سجفک ، ملک و قوم انا راجی آسراتی و اوفتا گچینی ننا مسخت ءِ۔
