پاکستان دمگی ءُ جھان ءِ امن ءِ دیمروئی ءِ واستہ جزم انت، وفاقی وزیر ڈاکٹر مصدق ملک

اسلام آباد۔29ستمبر  (اے پی پی): موسمیاتی بدلی ءُ چاگردی ہم آہنگی ءِ وفاقی وزیر ڈاکٹر مصادق ملک ءَ دمگی ءُ جھان ءِ امن ءِ دیمروئی ءِ واستہ پاکستان ءِ عزم ءِ یک رندے پدا گوشت کہ بدل بوھوکیں جیو پولیٹیکل جاور ھال آنی تہ ءَ پاکستان جھان ءِ استحکام ءِ واستہ وتی کرد ءَ را برجاہ دار ایت۔ چیک ریپبلک ءِ راجی روچ ءِ موہ ءَ برجم داشتگیں استقبالیہ ءَ گوں گشتانک دیان ءَ وفاقی وزیر ءَ گوشت کہ پاکستان ءَ خطہ ءَ امن ءِ دیمروئی ءِ واستہ برجمیں کوشست کتگ ءُ سرجمیں دگنیا ءَ برجائی ءِ واستہ وتی کرد ءَ پیلو کنگ ءِ واستہ جزمیگ انت۔ 2021 ءَ پاکستان ءُ چیک ریپبلک ءِ نیام ءَ دفاعی صنعتی ءُ رسد ءِ کمک ءِ معاہدے ءِ حوالہ ءَ آئی ءَ گوشت کہ پاکستان استیں فریم ورک ءَ را کارمرد کنان ءَ جھان ءِ استحکام ءِ تہ ءَ وتی کرد ءَ پیلو کنگ ءُ نوکیں نسل ءِ واستہ امن ءُ اُمیت ءِ دیمروئی ءِ واستہ کوشست کنت۔ آئی ءَ گوشت کہ دگنیا ءَ یک نیٹ سیکورٹی پروائیڈر ءِ گپ کنگ بوتگ وھدیکہ پاکستان ءَ وت ءَ را نیٹ پیس پروائیڈر جوڑ کنگ ءِ جزم کتگ۔ مسدق ملک ءَ گوشت کہ پاکستان ءِ مزن وزیر ءُ فیلڈ مارشل امن ءِ دیمروئی ءِ واستہ جزمیگ انت ءُ ملک دمگی ءُ جھان ءِ برجائی ءِ واستہ وتی کرد ءَ پیلو کنگ ءِ واستہ کوشست ءَ برجاہ دار ایت۔ پاکستان ءُ چیک ریپبلک ءِ نیام ءَ دیریں سیادی ءِ سر ءَ چمشانک دیان ءَ آئی ءَ گوشت کہ دوئیں ملک آنی نیام ءَ سیادی پاکستان ءِ جوڑ بوھگ ءَ چہ پیسر ءِ انت ایشی ءِ تہ ءَ تجارت، ٹیکنالوجی، وانگ ءُ زانگ ءُ دفاعی شوبگ آنی تہ ءَ کمک ھوار انت۔ آئی ءَ پاکستان ءَ بٹا ءِ ھست بوھگ ءُ بٹا پور ءِ جوڑیشت ءَ را دوئیں ملک آنی نیام ءَ دیریں تجارتی سیادی ءِ مثال لیک ات ءُ گوشت کہ اے کمپنی انگت ءَ سرجمیں پاکستان ءَ باز زانگ بیت۔ وفاقی وزیر ءَ گوشت کہ وزیر توانائی ءِ بستار ءَ وتی مدت ءِ تہ ءَ آئی ءَ دیستگ کہ پاکستان ءِ توانائی ءِ بنیاتی ڈھانچگ ءَ چیک ٹیکنالوجی ءِ کارمرد کنگ بوتگ، ایشی ءِ تہ ءَ منگلا منصوبگ ھم ھوار اَنت۔ مصدق ملک ءَ وانگ ءُ زانگ ءِ کمک ءِ سر ءَ ھم زور پر دات ءُ گوشت کہ سداں پاکستانی نودربر چیک یونیورسٹی آنی تہ ءَ وانگ ءَ اَنت اودا آھاں نوکیں ٹیکنالوجی، کاروباری ماڈل ءُ میاں اوستمانی کارروائی آنی بابت ءَ سرپدی ءِ موہ رسگ ءَ اِنت۔ آئی ءَ گوشت کہ چیک جمہوریہ پاکستانی نودربر آناں میاں اوستمانی تجربگ ءِ گر ءُ دار کنگ ءُ ھما ھنر آناں دیمروئی دیگ ءِ واستہ موہ دنت ایش آھاں گلوبل سٹیزن جوڑ بوھگ ءَ کمک کت کنت۔ وفاقی وزیر ءَ مراگش ءَ بہر زورگ ءِ سر ءَ وشھالی ءِ درشان کنان ءَ چیک ریپبلک ءِ دود ءُ ربیدگی ورثہ ءُ پراگ ءِ راجدپتری زیبائی ءِ توسیپ کت۔ آئی ءَ پاکستان ءُ چیک ریپبلک ءِ نیام ءَ سیادی ءَ را گیش مھکم کنگ ءُ ھما شوبگ آنی تہ ءَ کمک ءَ را گیش کنگ ءِ واھشت ءِ سر ءَ زور پر دات کہ امن، برجائی ءُ وشھالی ءِ دیمروئی ءَ کمک بہ کن اَنت۔