ضلع جہلم اٹی پین 14بندغ نا کروناوائرس آن زہمی مننگ پک، دا بابت ویل آتا ایسری کن یونین کونسل نا کہول آ کمیٹی جوڑ کننگانے، بنجائی وزیر سائنس و ٹیکنالوجی فواد حسین چوہدری نا ٹویٹ
اسلام آباد۔ 25مارچ(اے پی پی) بنجائی وزیر سائنس اینڈ ٹیکنالوجی فواد حسین چوہدری پارینے کہ ضلع جہلم اٹی پین 14بندغ نا کوروناوائرس آن زہمی مننگ نا پک مننگ آن پد دا بابت ویل آتا ایسری کن یونین کونسل نا کہول آ کمیٹی جوڑ کننگانے۔ چارشنبے نادے آ تینا ٹویٹ اٹی اوپارے کہ کوروناوائرس نا تالانی ءِ توننگ کن گام گیج آتیان زہمی تپہ نا گرج و ویل آتا رداٹ دمدستی گام گیج کننگک۔ اوپارے کہ زہمی تا گرج آتا رداٹ راشون و ایلو ضرورت نا گڑاتا فہرست ءِ تیار کننگ نا عمل نا بناءِ کننگانے۔ اوپارے کہ جہلم اٹی کورونانا پین 14کیس پک مسنے۔ بنجائی وزیر پارے کہ کوروناوائرس آن زہمی زیات تر ناجوڑ آک پیشن نا ملک آتیان بسنو یا اوفتا قریبی سیال ءُ۔ اوپارے کہ نن پیشن نا ملک آتیان پدی بروک آ بندغ آتیان وار وار آ خواست کرینن کہ او 14دے اکن قرنطینہ ٹی رہینگر و ایلو بندغ آتون ملنگ و اوڑدہی آن پاناد کیر تانکہ او تینٹ و اوفتا عزیز و سیال آک وائرس نا خطرہ غان رکھ مریر۔