مزن وزیر ءِ معاشی ریلیف پیکیج ءِ وش اتک، پاکستان ءِ معیشت ءِ یورپی یورپی ملک آنی گوما ھمگونگی کنگ بیت نہ کنت، ھمے سبب انت کہ مزن وزیر لاک ڈائون ءِ ھک ءَ نہ انت، اسد عمر

اسلام آباد ۔ 25 مارچ (اے پی پی) بنجاھی وزیر برائے منصوبگ بندی، دیمروئی گامگیج اسد عمر ءَ گوشت کہ مزن وزیر عمران خان ءَ کورونا وائرس ءِ شنگ ءُ تالان ءِ رد ءَ الس ءِ واستہ ٹوھیں معاشی ریلیف پیکج دیگ ءِ جار جتگ، پاکستان ءِ معیشت ءَ را گوں یورپی ملک آنی گوما ھمگونگی کنگ بیت نہ کنت، ھمے سبب انت کہ مزن وزیر عمران خان لاک ڈائون ءِ ھک ءَ نہ انت۔ اے ھیالانی درشانی آئی ءَ گوستگیں روچ ءَ جندی ٹی وی چینل ءَ گوں تران کنان ءَ کت۔ کورونا وائرس ءِ ھوپ ءِ رد ءَ مزن وزیر ءِ نیمگ ءَ چہ جار جتگیں معاشی پیکج ءَ را وش اتک کنان ءَ اسد عمر ءَ گوشت کہ اے پیکج ءَ چہ ھمک روچی دست ءِ سر ءَ ازمت کنوک آناں کمک رسیت۔ آ ملک ءِ لاک ڈائون ءِ ساھت ءَ کار کنگ ءُ کمائینگ ءَ بندی انت۔ آئی ءَ گوشت کہ اے پیکج ءَ چہ برآمد کنوک آناں ھم کمک رسیت۔ ھما کہ سرجمیں دگنیا ءَ اقتصادی کار آنی سست بوھگ ءِ سبب ءَ بے روزگاری ءِ آماچ بوتگ انت۔ حکومت ءَ 100 ارب کلدار مالیت ءِ پیکج ءِ پجارینگ ءَ چہ لیکویڈیٹی ءَ را برجا کنگ ءِ سرجمیں کوشست کتگ۔ جوڑیشتی پڑ ءِ واستہ اسد عمر ءَ گوشت کہ حکومت یک یا دو ھپتگ آنی تہ ءَ دگہ پیکج ءِ جار ءَ جنت۔ آئی ءَ گوشت کہ جوڑیشتی پڑ ءَ 30 ءَ چہ زیات صنعت آناں ھوار کنگ بیت ءُ اے توامیں شوبگ آنی تہ ءَ کاروباری چست ءُ ایر ترند بوھگ ءَ ابید مزنیں کساس ءَ مزور آنی واستہ روزگار ءِ موہ پیداک بیت۔ اسٹیٹ بینک ءِ نیمگ ءَ سود ءِ کساس 5۔1 درسد یا 1500 بنیاتی ٹک آنی تہ ءَ مٹ ءُ بدلی ءِ جار جنگ ءِ ھوالگ ءَ یک جستے ءِ پسو ءَ اسد عمر ءَ مزن وزیر ءِ اے پیسلہ ءَ را وش اتک کت ءُ گوشت کہ ایشی ءَ چہ ھاسیں رنگ ءَ کاروباری برات آنان سیت رس ایت۔ پبلک سیکٹر ڈویلپمنٹ پروگرام (پی ایس ڈی پی) ءِ رد ءَ بنجاھی وزیر ءَ گوشت کہ وزارت ءِ ھزانگ ءَ دیمروئی ھرچ ءُ درچ آنی گر ءُ دار ءِ واستہ مالی سال 20-2019 گڈی سئے ماھ آنی تہ ءَ پی ایس ڈی پی ءِ سر ءَ جتگیں کچ ءُ کساس ھم معاف کتگ انت بلے نوں اے کچ ءُ کساس ءَ چہ معافی ءَ چہ پد امیت انت کہ پی ایس ڈی پی ءِ چیر دستی ءَ گیشینتگیں سرجمیں زرّ منصوبگ آنی سر ءَ ھرچ کنگ بنت۔