کوئٹہ۔25مارچ(اے پی پی) ڈپٹی کمشنر قلعہ سیف اللہ ڈاکٹر عتیق الرحمان شاہوانی پارینے کہ محکمہ امور داخلہ بلوچستان نا پرمان تارداٹ کوروناوائرسءِ کنٹرول کننگ کن پاک اوغان سیم ءِ مہالوآن سیل کننگانے، گڑاس زموار غلط ہوکاتالان کننگ ءُ، ضلع نا دنگ پاک اوغان بارڈر تون کچر تحصیل لوئی بندآن ہلیس ضلع ژوب کیش تو اتون سب تحصیل بادینی کم و ود 100کلومیٹر نا فاصلہ غا تالان ءِ۔ضلع قلعہ سیف اللہ نا دنگ اٹی باڑفینسنگ پورو مسنے۔ باڑاتون اوار اوار سیم آ ہر اسہ کلومیٹر آ ایف سی قلعہ سیف اللہ سکاؤٹ نا اسہ واچ ٹاور و ہر مسہ کلومیٹر آ ایف سی نا قلعہ اس ساڑی ءِ ہراٹی خاصی کچ نفری ایف سی 24گھنٹہ تینا فرض ءِ سرتننگ ءُ۔ داکان بیدس ننا لیویز فورس انا 7فیڈرل لیویز تھانہ ءُ ہرافتے ٹی بھلو کچ اسے ٹی لیویز فورس انا ورناک سیم اٹی امن و ایمنی ءِ کاریم اٹ اتنگ کن تینا ڈیوٹی تے سرانجام تننگ ءُ۔ باڈر آ رکھ اکن ایف سی و لیویز اسیجا گشت کننگ ءُ کوروناوائرس نا توننگ کن بارڈر نا ہڑتوم آ کنڈانا الس ءِ باخبر و کرونا نا برخلاف آگاہی مہم اس چلیفنگ ءُ و خلقت ءِ ترغیب ایترہ کورونا آن بچنگ نا وڑوڈول و جتا جاگہ غاتیا آگاہی مہم نا پوائنٹس جوڑ کروک ءِ، باقاعدہ علاقہ ٹی پمفلٹ بشخنگ اُن، مسیت آتیان عالم دینک دینی بابت چندی تدابیر و کرونا نا توننگ کن کلہو جاری کننگ ءُ، داخیال آتا درشانی ءِ او میڈیا ءِ حوال ترسا پارے کہ ضلع ءِ پورو لاک ڈاؤن کرینن، کل ہن و بر تیا پابندی ءِ شار ءِ بند کننگانے، نیشنل ہائی وے و شار انا ہوٹلک پورو بنددوکان آک بند بیدس جان جوڑی میڈیکل اسٹور لیبارٹری و اوفتے تون گنڈوک عملہ کانود نافذ کروک آ طبی کمک نا المی بندغ آک داڑآن مستثنیٰ ءُ۔ داکان بیدس کیڈٹ کالج قلعہ سیف اللہ ءِ قرنطینہ سینٹر ضلع کن ڈیکلیئر کرین کرنٹائن سینٹر چندی ہسپتال آتے ٹی آئسولیشن وارڈ نرینہ و نیاڑی تا جوڑ کرینن دے ونن ڈاکٹر آک تینا ڈیوٹی تیا سلوک ءُ غٹ ضلعی انتظامیہ و لیویز فورس 24گھنٹہ بالترتیب ڈیوٹی تننگ ءُ، کنٹرول روم آن باقاعدہ پارت جاری مریک اے ڈی سی رینو ءِ نیشنل ہائی وے آ زائر و ایلو مسافر آتے کن کمک فراوان کننگ اُن۔ اوپارے کہ میڈیا نا ہم فرض مریک کہ کوروناوائرس نا توننگ نا سوب و تدابیر السی مہم نا بشخ مریر و کرونا نا برخلاف تینا توار ءِ بڑزکیر الس آن خواست کینہ کہ دا ناجوڑی نا درمان بیرہ اُراتیٹٛی رہینگ انگ ءِ تینے رکھ کیر تینا و ایلوفتا زند آتے بچفنگ صدقہ جاریہ ءِ۔
