کوئٹہ۔24مارچ(اے پی پی) گورنر بلوچستان امان اللہ خان یاسین زئی پارینے کہ سردست کوروناوائرس نا ممکنہ گڑتی نا رداٹ الس نا جان و مال انا دمدستی و وخت آ رکھ اکن کوروناوائرس آن خلینگ نا جاگہ غا ننے اواری اٹ دادے بے سہب کروئی مریک، دارداٹ دا ناجوڑی نا مون ءِ توننگ نا پائیدار ایسر تینا روایتی رویہ و سوچ و اپروچ اٹی پوسکن آ انسانی گرج و راجی خواست آتارداٹ بدلی اتنگ تون گنڈوک ءِ، گورنر یاسین زئی تینا اسہ بیان اسے ٹی پارینے کہ کوروناوائرس بے کچ اہم و حساس ءُ ویل اسے و دانا خطرہ ہم ودانے ولے کوروناوائرس ءِ پورو شکست تننگ کن الس غٹ رکھی تدابیر آتیا سختی اٹ عملدرآمد کیرو حکومتی کہول آ چست کروک گام گیج آتے ٹی پبی کمک فراوان کیر، اوحکومت آ زور شاغاکہ واپاری و کاروباری ہند آتا بند مننگ نا سوب آن غٹ خواری کش تپہ داوخت آ چندی مشکلات آتا پلویڑ اٹی ءُ ہنداخاطرآن اوفتا مون تروک مشکل آتے کم کننگ کن غٹ دوئی وسیلہ غاتے کاریم اٹ اتیر، ہنداخاطرآن داہم المی ءِ کہ راج انا غٹ مخیر خوارجہ و خاص کر مالی وس تخوک آ بندغ آک دا مشکل نا داساہت اٹی تینا نیزگار و بے وس ایلم تا پبی کمک فراوان کننگ اٹ تینا فرض ءِ ادا کیر۔ گورنر یاسین زئی پارے کہ الس اٹی کورونا وائرس نا برخلاف اجتماعی احساس تالان کننگ، الس ءِ خلیفنگ نا جاگہ غا ممکنہ خطرہ غاتیان خبڑدار کننگ، و دانا توننگ کن حکومتی گام گیج آتے پین گچین کننگ نا گرج ءِ، گورنر یاسین زئی داہیت انا باوری نا درشانیءِ کرینے کہ مچ آ دنیا نا سائنسدان و تعلقدار چاہندارآک سرگرم عمل ءُ و بھاز زوت کرونا وائرس نا سوب تالان مروک آ ناجوڑی نا گچین درمان ءِ پٹنگ اٹ سرسہب مرینہ۔
