پمز اٹی کورونا وائرس نا 260شکبر ناجوڑ آتا ٹیسٹ ءِ ہلنگا، 20ناجوڑی آتے ٹی کورونا ٹیسٹ مثبت بس، آئیسولیشن وارڈ اٹی 9ناجوڑ درمان مننگءُ، 2ناجوڑنا حالیت نازرک ءِ

اسلام آباد۔ 24مارچ(اے پی پی) پاکستان انسٹیٹیوٹ آف میڈیکل سائنسز (پمز) انا ایگزیکٹو ڈائریکٹر انصر محمود پارینے کہ پمز اٹی داوخت اسکان کورونا وائرس نا 1200آن زیات شکبر کیس بس، 260ناجوڑ آتا ٹیسٹ ءِ ہلنگا، 20مریض آتے ٹی کوروناٹیسٹ مثبت بس، آئیسولیشن وارڈ اٹی داوخت 9مریض درمان مننگ ءُ، 2مریض نا حالیت نازرک ءِ۔ سے شنبے نادے آ میڈیا ءِ پریس بریفنگ ترسا اوپارے کہ 29کٹ آتیا تالان پوسکن ءُ وارڈ اس جوڑ کننگ انگ ءِ ، بروک آ 15دے اٹی وارڈز اٹی پین ودکی کننگک۔ اوپارے کہ ننا کوشست ءِ کہ ہروڑنا کمتی تون مون تروک مف، غٹ باندات آتے این ڈی ایم اے ہُننگ ءِ۔ اوپارے کہ نرس و ڈاکٹر آتے آسراتی تننگ نا بابت کاریم کننگ اُن، میڈیکل عملہ نا بچفنگ ننا اولیت ءِ، اومیت ءِ بروک آ دے تیٹی نن تون ہچ ءُ گڑاسے نا کمتی مفک۔ اوپارے کہ پمز انا اوپی ڈی ٹی 10ہزار مریض بریرہ، اوپی ڈی ٹی مریض آتا بننگ اٹ بھاز کمتی مسنے، ڈاکٹر ظفر مرزا نا پارت آتیا پمز انا غٹ بشخ آتا او پی ڈی تے بند کننگانے، زیات تر ناجوڑ بندغ آتے ایمرجنسی ٹی ہُننگ انگ ءِ۔ او پی ڈی اِرٹ آن مسہ تُو اکان بند کننگک۔ اوپارے کہ پمز ہسپتال نا انتظامیہ پورو کوشست کننگ ءِ کہ ہر کاریم ءِ جوانی اٹ سرانجام تننگے۔ اوپی ڈی ٹی کیہی مریض آک ہڑدے بریرہ۔ دا مرض ترندی اٹ تالان مننگ ءِ ہراڑے کن احتیاط المی ءِ ، نن فیصلہ کرینن کہ اوپی ڈی نا سروس ءِ بند کننگے۔ ایمرجنسی ٹی غٹ آسراتیک ساڑی ءُ، ہموڑے زیات ناجوڑ بندغ آتا درمان ءِ کننگک۔ اوپارے کہ سرجیکل ماسک آتا ہچ ءُ کمتی اس اف، بھلو کچ اسے ٹی اریر۔ اوپارے کہ آئسولیشن اٹی کاریم کروک آ ڈاکٹر آتے کٹس و المی گڑاتننگانے۔ اومستی پارے کہ این ڈی ایم اے نا کنڈآن اِرا پین وینٹی لیٹرز فراوان کننگانے۔