کوروناوائرس نا توننگ نا بابت حکمت عملی آ گپ وتران
اسلام آباد۔ 24مارچ(اے پی پی) وزیر خارجہ شاہ محمود قریشی ہسپتانوی وزیر خارجہ ارنچاگونزیلز لایاءِ ٹیل فون کرے و کورونا وائرس نا توننگ نا بابت حکمت عملی آ گپ وتران کرے۔ وزیر خارجہ شاہ محمود قریشی کورونا دین انا سوب آن اسپین اٹی مروک آ نہادی جان تا زیان آ است ہسونی نا درشانی ءِ کرے۔ وزیر خارجہ دادین نا مون ءِ توننگ کن سپین نا حکومت نا کنڈآن کروک آ وخت آ گام گیج و دا چیلنج نا عزم و ہمت اٹ مقابلہ ءِ کروک آ اسپین نا ہیلتھ ورکرز آتا قربانی تا ستاءِ کرسا پارے کہ ننے دا خوشی مس کہ اسپین اٹی رہینگوک اسہ لکھ انا خڑک پاکستانی کمیونٹی مشکل نا دا ساہت اٹی ہسپانوی الس تون ہم کوپہ سلوک ءُ ۔ وزیر خارجہ تینا ہسپانوی ہم منصب ءِ دا جہانی دَینی مرض ان ارداٹ مقبوضہ کشمیر نا تشویشناک حالیت آتیان معلومدار کرسا پارے کہ تدوک آ 8تُوآن 80لکھ کشمیری، پدریسہ کرفیو نا حالیت اٹ بھارتی استبداد تون مون تننگ ءُ۔ ہموڑے خور و دوائی تا بھاز کاختی ودی مسنے، جہانی برادری داحالیت آتا نوٹس ءِ ہلے ۔ وزیر خارجہ ساڑی آ جہانی دین انا رداٹ ایران آ خلوک پابندی تا دمدستی چٹفنگ نا گرج آ زور شاغسا پارے کہ ایران اٹی کورونادَین انا گواچی ہزار آ بندغ آتا زند ءِ بچفنگ کن المی ءِ کہ زرگزرانی پابندی تے ہرفنگے تانکہ ایران تینا وسیلہ غاتے دا دین انا تدارک کن کاریم اٹ اتنگ کے۔
