اسلام آباد۔20مارچ(اے پی پی) وزیراعظم عمران خان پارینے کہ کورونا وائرس نا حالیت آتیا ہڑدے ئی بنداوتیا جاچ ءِ ہلنگک، ہفتہ ٹی اِراوار الس ءِ کورونا وائرس نا حالیت آتیان ای تینٹ معلومدارکیوہ، 15جنوری آن پد چین نا حکومت تون پدریسہ رابطہ ٹی اُٹ، تفتان حالیت آتیا وزیراعلیٰ تون اوار کس اسے زموار گوندنگ سہی اف، چین آن پاکستان اٹی کورونانا اسہ کیس اس ہم بتنے، میڈیامالکان، اینکرز و صحافی تیان خواست ءِ کہ سنسی خیزی آن پاناد کننگے، کوروناوائرس آن جنگ ءِ کٹنگ کن قوم ءِ ہڑدڑ کننگ نا جاگہ غا یکجا مروئی مریک۔ داخیال آتا درشانی ءِ او جمعہ نادے آ سینئر صحافی تتون گپ وتران کرسا کرے۔ وزیراعظم کابینہ باسک آتے پارت کرے کہ او ہروخت اسلام آباد اٹی مریر و اسٹ اس ہم چھٹی کپک ۔وزیراعظم پارے کہ کورونا وائرس ناحالیت آتا ہڑدے ئی بنداو تیا جاچ ءِ ہلنگک۔ اوپارے کہ چین بناٹی حالیت آتا مون ءِ توتوکہ تو بھاز بھلو بھس کاری اس تالان مننگ کریکہ ولے ہراحکمت عملی تون او گام گیج کرے او سفت نا قابل ءُ۔ چین ناآزموندہ غاتیان ہم ہیل کننگ اُن۔ اوپارے کہ ہفتہ ٹی اِراوار الس ءِ کوروناوائرس نا حالیت آتیان معلومدار کیوہ۔ وزیراعظم پارے کہ15جنوری آن پد چین نا حکومت تون پدریسہ رابطہ ٹی اُٹ، چینی سرکڑدہ غاتا گچین حکمت عملی نا سوب چین آن پاکستان اٹی کورونانا اسہ کیس ہم اس بتنے۔ اوپارے کہ قم آن زائر آتا بننگ آن پد ایران تون پدریسہ رابطہ ٹی اُن، بناٹی تفتان اٹی المی آسراتی تا کمتی ئس، ڈاکٹر ظفرمرزا تینٹ تفتان آہناو المی آگڑاتے سرکننگا۔ تفتان حالیت آتیا وزیرعلیٰ بلوچستان تون اوار کس اسے زموار گوندنگ سہی اف، ایران اٹی طبی آسراتی تا کمتی نا سوب آن کوروناکیس آتے ٹی ترندی اٹ ودکی مس، جہانی برادری کوروناوائرس نا حالیت آتا سوب ایران آ خلوک پابندی تے دمدستی ہرفے۔ داوخت آ وزیراعظم نا خصوصی کمکار ڈاکٹر ظفرمرزا ، ڈاکٹر فردوس عاشق اعوان و سلاہکار خزانہ ڈاکٹر عبدالحفیظ شیخ آن بیدس چیئرمین این ڈی ایم اے ئسک ہم ساڑی ئسر۔
