صوبہ ءِ کورونا وائرس آن بچفنگ و اونا تالانی ءِ توننگ کن جنگی بنداو تیا گام گیج کننگ اُن، وزیراعلیٰ بلوچستان جام کمال خان نا کورونا وائرس تون مون تننگ کن کور کمیٹی بلوچستان نا دیوان آن تران

کوئٹہ۔20مارچ(اے پی پی) وزیراعلیٰ بلوچستان جام کمال خان نا کماشی ٹی کورونا وائرس تون مون تننگ کن کور کمیٹی بلوچستان نا دیوان جمعہ نادے آ مس، دیوان اٹی صوبائی وزیر زمرک خان اچکزئی، چیف سیکرٹری بلوچستان فضیل اصغر و تعلقدار ادارہ غاتا سیکرٹریز و بڑزکو کمامدارآک ساڑی ئسر، داوخت آ وزیراعلیٰ بلوچستان جام کمال خان ءِ کورونا وائرس آن بچنگ و اونا تالانی ءِ توننگ کن حکومتی گام گیج آتیا سرجم حوال تننگا، وزیراعلیٰ پارے کہ صوبہ ءِ کورونا وائرس آن بچفنگ و اونا تالانی ءِ توننگ کن جنگی بنداوتیا گام گیج کننگ اُن، و دا بابت ڈیوالائی ءِ سگپنہ، کورونا وائرس نا بابت آن غٹ اسٹیک ہولڈرز آتون پدریسہ رابطہ ٹی اُٹ۔ و دا بابت غٹ حکومتی مشینری تے مست آن فعال کننگانے۔ وزیراعلیٰ بلوچستان جام کمال خان الس آن ہم کمک نا خواست کرے و السی طبی چاہندار آتا رغاموک آ اصول آتیا ضرور عمل کیر، صوبہ ٹی ہیلتھ ایمرجنسی نافذ ءِ ایمرجنسی کلاز نا رداٹ طبی ازباب ہلنگ نا اجازت ءِ انسانی جان تیان زیات نہادی ہچ ءُ گڑاس اف الس نا رکھ اکن ہر حداسکان کانہ۔ اوپارے کہ طبی عملہ و ڈاکٹرزآک فرنٹ لائن آ کاریم کننگ ءُ اوفتا است بڈی المی ءِ نن بیرہ کوئٹہ ءِ آخا مچ آ صوبہ ءِ کورونا وائرس آن بچفنگ کن فوکس کروئی ءِ۔ ہر ڈویژن کن انتظامی سیکرٹری تے فوکل پرسن پن کرسا ہموڑے تعینات کننگانے۔ وزیراعلیٰ اپوزیشن جماعت آتیا زوشاغا کہ حساس وخت اٹی سیاست آن پاناد کیر اپوزیشن الس ءِ گمراہ کننگ نا جاگہ غا حکومتی کوشست آتون تفر۔