اسلام آباد۔ 20مارچ(اے پی پی) وزیراعظم نا خصوصی کمکار جان جوڑی ڈاکٹر ظفر مرزا کورونا وائرس نا معلومداری کن جوڑکروک ہیلپ لائن نا دورہ ءِ کرے، تعلقدار کمامدارآک ہیلپ لائن نا بابت ڈاکٹر ظفر مرزا ءِ حوال تسر۔ داوخت آ گپ وتران کرسا ڈاکٹر ظفر مرزا پارے کہ بنجا و صوبائی حکومت آک اواری اٹ اسہ قومی ایکشن پلان اسے آ تندہی اٹ عملدرآمد کننگ ءُ، وزیراعظم عمران خان کورونا وائرس نا ساڑی آ حالیت آتا تینٹ چاروکی ءِ کننگ ءِ۔ اوپارے کہ حالیت آتا لمحہ بہ لمحہ سخت چاروکی ءِ کننگ انگ ءِ و غٹ تعلقدار ادارہ بشمول وزارت جان جوڑی کورونا وائرس تون مون تننگ کن ہروڑنا گام گیج آتے پک کننگ ءِ۔ اوپارے کہ حکومت پاکستان اولیکو دے آن کورونا وائرس آن بچنگ کن گچین گام گیج آتے پک کننگ ءِ۔ اوالس آ زور شاغا کہ پاریزی و احساس زمواری اٹ داوائرس نا تالانی ءِ توننگ کینہ ، ننےغٹ اواری اٹ کوروناوائرس نا ڈٹ کر مقابلہ ءِ کروئی ءِ، داڑآن خلوئی اف۔ اومستی پارے کہ کورونا وائرس تون مون تننگ کن ڈٹ کر مقابلہ ءِ کننگ آن جیت ننا مریک۔ اوالس آ زور شاغا کہ حکومت پاکستان نا جاری کروک پاریزی آ عملدرآمد ءِ پک کیر۔ اوپارے کہ کورونا وائرس نا بارواٹی الس ءِ آگاہی فراوان کننگ اٹ میڈیا نا بھاز بھلو کڑد اسے۔ اوپارے کہ کورونا وائرس نا بارواٹی معلومداری کن 1166آ رابطہ کننگ مریک۔ 9ہزار آن زیات کالز ہڑدے ہیلپ لائن آ موصول کننگ انگ ءِ۔
