غٹ اختلاف آتے اسہ کنڈ تخسا اواری اٹ کورونا وائرس نا چیلنج تون مون تروئی مریک، وزیر خارجہ مخدوم شاہ محمود قریشی

اسلام آباد۔ 20مارچ(اے پی پی) وزیر خارجہ مخدوم شاہ محمود قریشی پارینے کہ سلف آئسولیشن ، ہیلتھ پروٹوکول نا پیروی ءِ کننگ کن المی ءِولے ہردے ئی دفتری کاریم تے اُراغان سرانجام تننگ اُٹ، ننے دا چیلنج اتون مون تننگ کن اسہ اجتماعی حکمت عملی اسے نا گرج ءِ۔ جمعہ نادے آ تینا اسہ بیان اسے ٹی اوپارے کہ تدوک آدے بذریعہ ٹیلی فون سیکرٹری خارجہ تون ہیت مس و نن فیصلہ کرین کہ ساڑی حالیت آتے مون آ تخسا دفتر نا اسٹاف ءِ کم آن کم تخنگے و ایلو اسٹاف ہراپبلک ٹرانسپورٹ ناکمک اٹ ہڑدے دفتر آ بریرہ اوفتے اُراٹی تولوک فرض ءِ سرانجام تننگ نا ترغیب تننگے۔ اوپارے کہ ای سمجھیوہ کہ ہر ادارہءِ داوڑنا چنکو چنکو رکھی گام گیج کروئی مریک، نن دا ہیت ءِ بایدے مون آ تخن کہ صوبائی یا بنجائی حکومت، خاہوت، و بندغ اس دا چیلنج نا تنیا مقابل ءِ کننگ کپک داڑتون مون تننگ کن ننے غٹ اختلاف آتے اسہ کنڈ تخسا اواری اٹ دا چیلنج تون مون تروئی مریک۔ وزیر خارجہ پارے کہ نن مہالو آن داپاننگ اُن کہ دا وخت سیاسی و اختلاف آتا اف سیاست کننگ کن بھلو وخت اس تموک ءِ ، داوخت آ سیاسی سرکڑدہ غاتا کنڈآن قومی بیانیہ نا ہیت بے کچ جوانءُ ہیت اسے۔ اوپارے کہ ہندا قومی حکمت عملی نا رداٹ وزیراعظم کورونا دَین انا چیلنج تون مون تننگ کن نیشنل سیکورٹی کمیٹی نا دیوان ءِ بٹنگاسس و غٹ صوبائی حکومت آک و قومی ادارہ غاتے داٹی اوارکریسس و سلابت آن پد نیشنل کوآرڈینیشن کممیٹی اس جوڑ کننگاسس اینو(جمعہ نادے) پیشیم نا دونیم بجہ غا دُوارہ وزیر اعظم عمران خان نیشنل کوآرڈینیشن کمیٹی نا دیوانءِ بٹنگانے تانکہ نیشنل سیکورٹی کمیٹی نا دیوان اٹی کروک آ فیصلہ غاتیا عملدرآمد نا جاچ ءِ ہلنگ مرے۔ اوپارے کہ وزیراعلیٰ پنجاب سیکرٹریٹ اٹی خلقت نا بننگ ءِ کچ اٹ کننگ نا پرمان کرینے ہرا بے کچ جوان ءُ گام اسے۔ وزیر خارجہ پارے کہ حکومت الس آن وار وار خواست کننگ ءِ کہ تینا ہن وبر کچ اٹ کننگے، مچی تیان پاناد کننگے۔ الس ءِ میڈیا نا کمک اٹ خواست کننگ انگ ءِ کہ اُراتیٹی مریر، اسکول آتے ٹی چھٹی ہم ہندا مسخت کن کننگا ولے اگہ لمہ و باوہ چناتے ریسٹورنٹ یا پارک آتیا دیرہ تو حکومت نا کوشست زیان مریک۔ شاہ محمود قریشی پارے کہ چین انا سرسہبی تا بنداوی سوب دادے کہ اوفتا حکومت دا دین اتون مون تننگ کن ہرا ہرا پرمان تے تسر چینی الس من و عن اوفتیاعمل کریر۔