کوئٹہ۔19مارچ(اے پی پی) حکومت بلوچستان بولان میڈیکل کمپلیکس ہسپتال و سول سنڈیمن ہسپتال کوئٹہ ٹی خذمت سرانجام تروک آ 80پوسٹ گریجویٹ ڈاکٹر آتا تنخواہ تیکن ہشت کروڑ روپئی جاری کرے، غٹ پوسٹ گریجویٹ ڈاکٹر آتے ہشت تُو انا سلوک آ پیسہ غاتے ہم ادا کننگک، داہیتءِ میڈیکل سپرنٹنڈنٹ بولان میڈیکل کمپلیکس ہسپتال ڈاکٹر محمدسلیم ابڑو‘‘اے پی پی’’ تون گپ وتران کرسا پارے۔ اوپارے کہ صوبائی دارالحکومت کوئٹہ نا ہڑتوم آ بھلا ہسپتال آتے ٹی طبی خذمت سرانجام تروک آ پی جی ڈاکٹرز آک کوروناوائرس نا ساڑی آ حالیت آتے ٹی انسانی خذمت نا جوزہ غان سرشار مرسا پورو تندہی اٹ کاریم کننگ ءُ ، حکومت بلوچستان پی جی ڈاکٹرز آتا تنخواہ تے جاری کننگ نا منظوری ءِ تسنے اومیت ءِ پی جی ڈاکٹرزآک داسہ مست آن ہم زیات خواری اتون کاریم کرسا قومی ایمرجنسی نا دانازرک وخت اٹی لائخی تا درشانی ءِ کیرہ اوپارے کہ بولان میڈیکل کمپلیکس ہسپتال ٹی کورونا وائرس نا ساڑی حالیت آتون مون تننگ کن غٹ تر بست وبند آک پورو ءُ، و بیست ءُ چار گھنٹہ غاتے ٹی مسہ ششفٹ اٹ کاریم کننگ انگ ءِ، طب انا چاہندار و غٹ ڈاکٹرز آتیان ہلیس سوئیپرز آتسکان ساڑی ءُ وزیراعلیٰ بلوچستان جام کمال خان چیف سیکرٹری و سیکرٹری جان جوڑی بلوچستان طبی ریلیف و سرجزآتے براہ راست مانیٹر کننگ ءُ و دامسخت کن چیف سیکرٹری آفس اٹی جوڑ خصوصی کنٹرول روم تسلسل اتون فعال ءِ کورونا وائرس نا ساڑی چیلنج اتون مون تننگ کن غٹ تر دوئی وسیلہ غاتے کاریم اٹ اتنگ انگ ءِ و سوگو اومیت ءِ کہ حکومت و الس اواری اٹ کروناوائرس ءِ شکست تننگ اٹ سرسہب مریرہ۔
