اسلام آباد۔19مارچ(اے پی پی) مچ آ ملک اٹی موبائل فون آسراتی فراوان کروک آ ہر مسٹ آ بھلا کمپنی جاز، ٹیلی نار، و یوفون تینا 8ہزار آن زیات ملازم آتے کاریم کننگ کن دفتر آ بننگ آن منع کریر، اُراتیٹی تولسا کاریم کننگ نا پارت جاری کریر، دا گامءِ کورونا وائرس ءِ تالان مننگ آن توننگ کن ہرفنگانے۔ مچ آ ملک اٹی موبائل فون آسراتی فراوان کروک آ ہرمسٹ آ بھلا کمپنیک نوٹیکفیشن جاری کرسا غٹ ملازم آتے پارت کریر کہ او تینا دفتری باندات آتے اُراٹی تولسا انجام تننگ کیرہ۔ کورونا وائرس آن تینے و ایلوفتے رکھ کننگ نارداٹ اوفتے دفتر آ بننگ نا ضرورت اف۔ دا کمپنیک تینا صارف آتیان ہم درخواست کرینو کہ او تینا غاو و ویل آتا بابت ڈیجیٹل ڈیوائسز ءِ کاریم اٹ اتیر۔ غاو تا حالیت اٹ صارف آتے دفتر آ بننگ نا جاگہ غا ڈیجیٹل ڈیوائسز نا کمک اٹ تینا باندات آتا بارواٹی کمپنی ءِ معلومدار کیر تانکہ اوفتا غاوتاازالہ ءِ کننگ مرے۔ دابابت جاز پارینے کہ کمپنی نا کم و ود3ہزار آن زیات ملازم آتے تینا اُراتیٹی رہینگسا کاریم کننگ نا پابند کننگانے۔ دا بابت موبائل فون کمپنی ٹیلی نار و یوفون ہنداوڑنا گام گیج کرسا تینا 5ہزار ملازم آتے اُراتیٹی تولسا دفتری باندات آتے پورو کننگ نا پارت جاری کرینو۔ کمپنی تا رداٹ دا پرمان 31مارچ2020ء اسکان قابل عمل مریک۔حالیت آتا رداٹ تاریخ اٹی ودکی کننگ مریک۔ جاز انا سی سی او عامر ابراہیم پارے دا مشکل وخت اٹی نن ملازمین، کاروباری شریدار و صارف آتا راجی آسراتی نا بابت ہم بھاز فکر مند اُن۔
