لاہور۔19مارچ(اے پی پی)پاکستان تحریک انصاف نا سینئر مرکزی راہشون و بنجائی وزیر ہمایوں اختر خان پارینے کہ پاکستان قوم اسُل مایوس و خوف انا گواچی اف و مشکل نا داساہت آن سرسہب مرینہ، کورونا وائرس نا برخلاف چست کروک آ گام گیج آتابابت تینا دیرینہ سنگت چین آن راہشونی ہلنگ اُن و نن ہم سرسہبی ٹی اونا پیرویءِ کینہ، مسلم لیگ (ن) نا کماش کورونا وائرس آہم تینا سیاست ءِ چمکائفنگ نا بے سہب کوشست کننگ ءِ ہرا مذمت نا قابل ءِ۔ تینا اسہ بیان اسے ٹی اوپارے کہ حکومت کورونا وائرس نا تالانی ءِ توننگ کن کچ اٹنگا وسیلہ غاتیان پد ہم ہروڑنا گام گیج کرینے۔ حکومت مشکل نا داساہت اٹی رکھی تدابیر اتون اوار اوار دا کوشست کننگ ءِ کہ الس نا ہردے ئی زند بالکل معطل مف۔ ملک اٹی کنوئی آ گڑاتا ہچ ءُ کاختی اس اف و انتظامیہ ءِ سختی اٹ پرمان جاری کننگانے کہ کوڑی کروک و تینا خود آن کبینی نا کمک اٹ الس نا استحصال ءِ کروک آتا برخلاف بے پرخ سخت گام گیج چست کننگے۔ ہمایوں اختر خان پارے کہ ہراتم مچ آ قوم ءِ سیوت نا گرج ءِ ہموحالیت آتے ٹی ہم مسلم لیگ(ن) تینا سیاست ءِ چمکائفنگ آن پدی سلنگ اف۔ قائد حزب اختلاف شہباز شریف لندن اٹ تولوک حکومت آ تنقید کننگ نا جاگہ غا ملک آ پدی برسا دا مشکل ساہت اٹی قوم اتون انت اکن سلپک۔ اوپارے کہ پاکستان اٹی ساڑی مسلم لیگ(ن) نا راہشون ہم تینا کماش نا نقش قدم تیا چلینگ انگ ءُ و تینا سیاست ءِ بچفنگ کن تنقید برائے تنقید آ عمل کننگ ءُ ہرامذمت نا قابل ءِ۔
