اسلام آباد ۔ 19 مارچ (اے پی پی) چیئرمین سینیٹ محمد صادق سنجرانی ءَ کورونا وائرس ءِ آماچیں مردم آناں آسراتی ءِ پجاری ءِ واستہ سینیٹ ءِ باسک آنی نیمگ ءَ یک ماھے ءِ پگار داد ءُ ٹیکی کنگ ءِ شور ءُ سلاھ داتگ۔ پنچ شمبے ءِ روچ ءَ سینٹ سیکرٹریٹ ءِ نیمگ ءَ جاڑی بوتگیں بیان ءِ رد ءَ چیئرمین سینیٹ ءَ گوشت کہ کورونا وائرس ءَ را گر ءُ دار کنگ مئے درستانی زمہ واری انت، مارا دیم ءَ جنزگی انت ءُ سرجمیں راج ءِ گوما اے ھوپ ءَ را باج برگی انت۔ آئی ءَ گوشت کہ سینیٹ ءِ باسک آنی داد ءُ ٹیکی کتگیں زرّ آں چہ اے ھوپ ءِ آماچیں مردم آنی واستہ گامگیج چست کنگ بیت۔ چیئرمین سینیٹ ءَ الس ءِ سر ءَ زور پر دات کہ آ رکھینگی پنت ءُ شون آناں پد ءُ رند بکن انت۔ سپائی ءِ سک باز ھیال داری ءَ بکن انت ۔ آئی ءَ گوشت کہ کورونا وائرس ءَ چہ ترسگ ءِ ضلورت نہ انت بلکینگ ءَ رکھینگی شور ءُ سلاھ آنا پد ءُ رند کنگ ءِ ضلورت انت۔ آئی ءَ گوشت کہ ایوان ءِ بالا اے موہ ءَ و تی راجدپتری نمیرانیں کرد ءَ پیلو کنت۔ پیسر ءَ ھم ھمک سکیں ساھت ءَ سینیٹ ءِ باسک آں وتی کرد پیلو کتگ انت۔ آئی ءَ گوشت کہ کورونا وائرس ءِ سبب ءَ پیداک بوھوکیں جاور ھال آنی رد ءَ مئے زمہ واری گیش ود اتگ انت۔
