کوئٹہ۔ 18مارچ(اے پی پی) صوبائی وزیر داخلہ میر ضیاء اللہ لانگو پارینے کہ قبائلی دشمنی تا سوب آن راج و علاقائی زرگزران و الس ءِ نسخان ہرفوئی تمک قبائلی جھیڑہ و دشمنی تا چٹفنگ مخلصانہ سلابت و ہیت وگپ اٹ مننگ کیک۔ داخیال آتا درشانی ءِ صوبائی وزیر داخلہ قلات/دشت گوران اٹی سناڑی و مینگل قبیلہ نا نیام اٹ مروک آ جنگ و جھیڑہ غاتے ٹی مروک آ نسخان تا جاچ ءِ ہلسا کرے۔ داوخت آ صوبائی وزیر راجی آسراتی میر اسد اللہ بلوچ ، نوابزادہ حاجی لشکری خان رئیسانی ، ایلو قبائلی سرکڑدہ و شرفمند آک ہم ساڑی ئسر۔ صوبائی وزیر داخلہ پارے کہ تاریخ گواہ ءِ کہ جنگ و جھیڑہ ہچ ءُ ویل اسے نا ایسری اف جھیڑہ غاتے ٹی انسانی جان تا زیان نا ہچ ءُ بدل اس اف، جھیڑہ غاتا سوب آن بھاز انگا خاہوت آتے نسخان ہرفوئی تمک ولے ساڑی حالیت آک قبائلی جھیڑہ غاتا متحمل مننگ کپسہ ننے سیوت و سخا و ایلمی ءِ مون آ دروئی ءِ دُن انگا جھیڑہ غاک قوم تے خورک کیرہ۔ قلات نا غیور الس مدام بلوچ روایت آتا پاسداری ءِ کرسا داوڑنا جھیڑہ غاتے تین پہ تینی رضامندی اٹ اواری اٹ تولسا ایسر کرینو قبائلی سرکڑدہ غاتون اواری اٹ داوڑنا غٹ جھیڑہ غاتے ایسر کننگ کن حکمت عملی اس طے کینہ اینو نا دا تاریخی جرگہ ننے پیار ومحبت رواداری و اسٹی نا سبخ ایتک ایسر اٹ مصالتی کمیٹی زوت جرگہ اس اڈتننگ نا فیصلہ کرے۔
