کوئٹہ۔18مارچ(اے پی پی)گورنر بلوچستان امان اللہ خان یاسین زئی پارینے کہ پیچیدہ ویل آتا پائیدار ایسر سنجیدہ فیصلہ غاتے ٹی اودیم ءِ۔ اوپارے کہ کورونا وائرس بے کچ اہم و حساس نوعیت نا ویل ءِ و دانا گڑتی ہم ودانے ولے کوروناوائرس ءِ شکست تننگ کن حکومت و الس ہڑتوم آک تیار ءُ۔ اوکورونا وائرس نا سوب آن تالان مروک آ ناجوڑی نا برخلاف چست کروک آ دمدستی و وخت آ حکومتی گام گیج آتیا است جمی نا درشانی ءِ کرسا پارے کہ الس اٹی کرونا وائرس نا برخلاف اجتماعی احساس تالان کننگ و توننگ کن حکومتی گام گیج آتے پین گچین کننگ نا سخت گرج ءِ۔ داہیت ءِ او وزیراعلیٛ بلوچستان جام کمال خان تون ٹیل فون آ گپ وتران کرسا کرے۔ہڑتوم آ راہشون تا نیام اٹ صوبہ ٹی کوروناوائرس تون مون تننگ کن بست و بند، سیم تا ہن و بر آ پابندی، کورونا وائرس آن زہمی بندغ آتا درمان و الس اٹی شعور آگہی نا مہم ءِ گچین کننگ آ گپ وتران کننگا۔ داوخت آ گورنر بلوچستان پارے کہ کورونا وائرس آن بچنگ ننا دوٹی ءِ۔ بنداوی احتیاطی تدابیر اختیار کننگ آن نئے بیرہ نن تینٹ داڑان رکھ مننگ کینہ بلکن ایلوفتے ہم بچفنگ کینہ۔ گورنر یاسین زئی پارے کہ دامشکل وخت اتون مون تننگ اٹ ہر بندغ نا فرض مریک کہ او رکھی تدابیر آ سختی اٹ عمل کے و ایلوفتے ہم داڑآن بچفنگ کن تینا بشخ انا کڑدءِ ادا کے۔ اوپارے کہ سردست حالیت آک قابو ٹی ءُ۔ و حکومت کورونا وائرس تون مون تننگ کن غٹ دوئی وسیلہ غاتے کاریم اٹ اتنگ ءِ۔
