لاہور۔ 18مارچ(اے پی پی) پنجاب نا وزیر خواندگی و غیر رسمی بنداوی تعلیم راجہ راشد حفیظ پارینے کہ خوف و دہشت آن زیات مہلک ہچ ءُ وائرس اس اف ہنداخاطرآن الس ءِ کورونا وائرس آن خوف زدہ مننگ نا گرج اف ۔ پنجاب حکومت صوبہ نا غٹ ضلع غاتے ٹی ڈپٹی کمشنرز آتا سرکڑدہ ئی ٹی ہندی راجی راہشون تیا تالان خصوصی کمیٹی جوڑ کننگ ءِ ہرا کورونا وائرس آن بچنگ، اونا خوف و دہشت ءِ کم کننگ و حفظان جان جوڑی نا بابت السی شعور نا بیداری کن کاریم کیرہ وخت اس کہ ہر ضلع و تحصیل نا کہول آ خصوصی ہیلپ لائن ہم جوڑ کننگ انگ ءِ ہرا لس شاری تا راہشونی کن فعال مریرہ۔ اوداہیت ءِ تینا دفتر سید پور روڈ اٹی چندی السی ڈل آتون اوڑدہی ٹی گپ وتران کرسا پارے۔ اوپارے کہ دا اسہ حقیقت اسے کہ خوف و دہشت آن زیات مہلک ہچ ءُ ناجوڑی و وائرس اس اف۔ کورونا وائرس داخہ مہلک اف اخس کہ اونا خوف و خلیس ءِ۔ اوپارے کہ پنجاب حکومت ایلو صوبہ غاتیانبار بنجائی حکومت تون مربوط رابطہ تخانن و تینا کنڈآن ہم غٹ وسیلہ غاتے کاریم اٹ اتسا ہروڑنا ہلہلہ ئی حالیت آتون مون تننگ نا پورو تیاری کرینن۔ اوپارے کہ مچ آ پنجاب اٹی ہر ضلع و تحصیل نا کہول آ ہسپتال ، محکمہ جان جوڑی و ہندی انتظامی مشینری پورو وڑاٹ الرٹ ءُ ہر جاگہ غا درکار آسراتی تے دوئی کننگانے، اگہ خوانخواستہ ہلہلہ ئی حالیت اس پیش بس تو اوڑتون مون تننگ نا پورو تیاری کننگانے۔ اوالس آن خواست کرے کہ او اسل خوفزدہ مفس ولے غٹ تر احتیاطی تدابیر ضرور اختیار کیر۔
