اسلام آباد۔ 18مارچ(اے پی پی) وزیر خارجہ شاہ محمود قریشی چین نادورہ غان پدی بننگ آن پد سیلف آئسولیشن نا فیصلہ ءِ کرینے ۔ چارشنبے نادے آ تینا اسہ بیان اسے ٹی وزیر خارجہ پارے کہ کورونا وائرس نا ٹیسٹ ءِ کرفیوہ، چاہندارآک پنچ دے آن پد کورونا ٹیسٹ انا مشورہ ءِ تسنو وخت اس کہ اُراوالاک کنے آن جتا ءُ، تینٹ ہم خواپرہ چناتتون ملیو، کورونا نا بابت احتیاط کننگے، چین سرکڑدہ غاتا پاننگ ءِ کہ آزمائشت نا وخت ءِ، وزیر خارجہ شاہ محمود قریشی پارے کہ دنیا چین آ بہتان خلنگ ءِ ، چین آن طالب علم آتا بٹنگ پننگ چینی حکومت آ پاکستان نا پت انا درشانی ئس۔ چینی صدر پاہک کہ پاکستان نا احسان تے است آن اسُل دپنہ۔ اوپارے کہ چین آ ہِننگ نا مسخت یکجہتی نا درشانی ئس۔ اوپارے کہ ایران آن زائر آتے اُراتیا پدی بروئی ئس۔ سیم آ کورونا آن بچنگ نا بست و بند آتے پین گچین مروئی ئسک۔ زائر آتا پدی بننگ نا فیصلہ بے کچ مشکل ئس۔ سعودی عرب 72گھنٹہ نا پابندی تو خلک۔ سعودی عرب آن عمرہ زائر آتا باندات آ ہیت مسنے۔ عمرہ زائر آتا وقفہ اٹ پدی اتنگ نا خواست کرین۔ ننے پاریز گری اٹ کمک کروئی ءِ ۔ شاہ محمود قریشی پارے کہ کورونا نا ویل آ قوم ءِ یکجا کروئی ءِ ، کورونا نا مقابلہ ءِ ہچ کس تنیا کننگ کپک۔ کورونا وائرس نا برخلاف غٹ ءِ اواری اٹ کاریم کروئی مریک۔ شاہ محمود نا پاننگ ءِ کہ ووہان اٹی تدوک آ دے بیرہ اسہ کیس اس رپورٹ مس۔ پورو لاک ڈاؤن آن زرگزران آ ہرازہم تمک اودے ہم ہروئی ءِ۔ ننے متوازن چاگڑد اس جوڑ کروئی ءِ۔ ننے الس ءِ پت ترفوئی ءِ و خلقت نا تکلیف ءِ کم کروئی ءِ۔ کورونا غا کنٹرول کننگ کن وزیراعظم نیشنل کوآرڈینیشن کمیٹی اس جوڑ کرے۔ ننے گڑاس وخت داڑآن دوچار مروئی مریک۔ وزیر خارجہ پارے کہ میڈیا بھارتی جارحیت نا برخلاف قومی سیوت نا درشانی ٹی اہم ءُ کڑد اس ادا کرے۔ کورونا نا معاملہ غا ہم گچین کڑد ادا کروئی مریک۔ کروڑ آ خلقت ءِ سنبھالنگ اسہ مشکل ءُ کاریم اس مننگ کیک۔ کورونا نا بابت خلقت ءِ ذہنی وڑاٹ تیار کروئی ءِ۔ داوخت آ جلسہ غاتا سوج ودی مفک۔
